Kúsh-qaýqarym barda toqtamaýym kerek - Erjan Shynkeev
Qazaqstandyq dzıýdoshy, halyqaralyq klasstyń sport sheberi Erjan Shynkeev Qaraǵandy oblysy Shet aýdany Qarabulaq kentinde týyp ósken. Anasy aýyldaǵy medıtsına qyzmetkeri bolsa, ákesi uzaq jyldar boıy zootehnık bolyp jumys istegen. Ol otbasynda bes balanyń eń kenjesi.
«Bala kezimnen sportpen shuǵyldandym. Aýylda múmkindik bolmaǵandyqtan, sportpen keshirek aınalysa bastadym. 14 jasymda qalaǵa kóshkennen keıin kúreske qatystym. Meniń alǵashqy bapkerim Qartaı Omarov boldy. Ókinishke oraı, ol qazir aramyzda joq. Meniń sporttyq mansabymnyń irgetasyn sol kisi qalady. Keıin jyl ótken saıyn dzıýdoǵa aýystym», - dedi Erjan.
Erjan Shynkeev Qaraǵandyda turyp, jattyǵady.
«Sportpen kem degende aptasyna alty kún jattyǵamyn. Al, bir kúnde eki ret. Durys tamaqtanýǵa tyrysamyn. Sebebi, men únemi salmaǵym men sporttyq formamdy ustap otyrýym kerek», - dep atap ótti sportshy.
Erjan 2009 jyly shyǵys jekpe-jek óneri boıynsha Azıada oıyndarynyń jeńimpazy. 2009 jyly Belgradta Ýnıversıadada Qazaqstan quramasynyń quramynda qola júldege ıe boldy. 2011 jyly Ábý-Dabıde Azııa chempıonatynda jeke birinshilikte «qola» júldeni jeńip aldy. Sondaı-aq, ol Azııa chempıonatynyń tórt dúrkin (2011, 2013, 2015, 2016) qola jeńimpazy. Sonymen qatar, kóptegen álemdik deńgeıdegi jarystardyń jeńimpazy atanǵan. Halyqaralyq klasstaǵy sport sheberi. «Qazaqstan barysynyń» kúmis júldegeri (2013 jyly), Alem Barysy-nyń qola medal ıegeri (2017 jyly).
Ol bıylǵy jeńisiniń arqasynda 25 mıllıon teńge, altyn belbeý men «Taıtuıaq» trofeıiniń ıegeri atandy. Budan bólek, qaraǵandylyq balýan 17 jyldyń ishinde 14 kólikti syılyqqa alǵan.
33 jastaǵy balýan otbasy týraly suraqtarǵa jyly shyraımen jaýap berdi. Sebebi onyń sporttaǵy alǵashqy jankúıerleri jaqyndary boldy. Erjan jubaıymen birge bir ul men bir qyz tárbıelep otyr. 12 jastaǵy uly áke jolyn qýyp, dzıýdomen kásibı túrde aınalysýda. Bıyl ol oblystyq týrnırde úshinshi oryn aldy.
«Meniń ulym sportty ózi tańdady. Men oǵan úlgi bolǵan shyǵarmyn. Sebebi, ol týǵannan bastap menimen birge jattyǵýǵa baryp júrdi. Meniń ata-anam qazir zeınetkerlik jasta. Bárimiz birge turamyz. Ár týrnırdiń aldynda, maǵan aq batalaryn berip otyrady», - dedi chempıon.
Erjan Shynkeev «Qazaqstan Barysy» týrnırine bes jyl qatarynan qatysyp keledi. Oǵan ár jekpe-jekte Qazaqstan Barysyn barlyq óńirlerdiń jeńgenin, tek Qaraǵandy ǵana áli kúnge deıin júlde almaǵanyn aıtqan. Bul sózder balýannyń namysyna tıip, onyń moınyna jaýapkershilik artyla túsken. Ol bar kúsh-jigerin salyp, jeńiske umtylǵan.
Jyl saıyn týrnırde birdeńe jetispeı qalyp otyrǵan. Ol jyl ótken saıyn óz kemshilikterimen jumys istep, tek qazaqsha kúrespen aınalysý úshin dzıýdodan da ketken.
«Men bul jeńiske jetý úshin uzaq ýaqyt eńbek ettim. Biraq, bir kúni jeńetinimen senip júrdim. Senimim osy joly aqtaldy. Sezimimdi sózben aıtyp jetkize almaımyn. Maǵan qoldaý kórsetken barshaǵa rahmet. Jattyǵý kezinde meni shyńdaǵan bapkerimen alǵysym sheksiz», - dep atap ótti Erjan Shynkeev.
«Qazaqstan Barysy» ulttyq kúres boıynsha VIII respýblıkalyq týrnırde elimizdiń 35 myqty palýany jınaldy. Qaraǵandylyq balýan bes kúshti qarsylasyn jeńip, myqty ekenin dáleldedi.
«Jekpe-jekte basty qarsylasymen ara qashyqtyq saqtadym. Oǵan jaqyn barsam, meni salmaǵymen uryp jyǵatynyn bildim. Onyń salmaǵy barlyq qatysýshylardyń ishinde eń aýyry boldy. Men ýaqyttan uttym, ol sharshańqyrap qaldy. Durys tásil men sporttyq ádis ony jeńýime kómektesti», - dedi Erjan.
Erjan Shynkeev aıdyń basynda Grýzııada ótetin «Álem barysy» halyqaralyq týrnırine attanady. Týrnır kúzde ótedi. Balýan bul jeńistiń ony ári qaraı yntalandyra túskenin atap ótti.
«Alla qalasa, kelesi jyly taǵy da «Qazaqstan Barysy» týrnırine qatyspaqshymyn. Sondaı-aq, 2020 jylǵy Olımpıadaǵa daıyndalamyn. Kúsh-qaýqarym barda toqtamaýym kerek. Maǵan meniń otbasym men jerlesterim, qaraǵandylyqtar úmit artyp otyr», - dedi balýan.
