Kúsh biriktirmeı, «Islam memleketin» jáne lańkestikti joıý múmkin emes - Elbasy
«Sırııa problemasyndaǵy Qazaqstannyń róli - Astanada sırııalyq qaqtyǵysýshy taraptar men Úkimet ókilderine jáne osy protsesti baqylap otyrǵan - Reseı, Iran, Túrkııaǵa basqosý ótkizýge múmkindik bergenimizde. Olardyń suraýy boıynsha birneshe osyndaı kezdesýler ótýde. Shynyn aıtqanda, Astana protsesinde Jenevadaǵy kezdesýde bolmaǵan taraptar boldy, ásirese oppozıtsııa jaǵynan. Olar Qazaqstandy birdeı qashyqtyqta ornalasqan, barlyq qaqtyǵysýshy taraptarmen birdeı qatynastaǵy memleket dep tanydy. Biz olarǵa bizdiń jerimizde kezdesýdi usyndyq, osyndaı joǵary deńgeıdegi kezdesýge barlyq jaǵdaılar jasap berdik. Men tildesken sarapshylardyń, BUU ókilderiniń bergen baǵasy boıynsha, bul kezdesýler ary qaraı beıbit protsesti jáne osy kelissózderdi ary qaraı jalǵastyrý úshin óte paıdaly boldy», - dep atap ótti Memleket basshysy reseılik arnaǵa bergen suhbatynda.
QR Prezıdenti terrorızmge qarsy kúreste barlyq memleketterdiń birlesken jumysy qajet ekendigin aıtty.
«Qazir men eshqandaı baǵa bere almaımyn. Biri hımııalyq shabýyl boldy jáne adam shyǵyny oryn aldy dese, ekinshi tarap bunyń bári bolǵan joq dep otyr. Osy máselede ádil sheshimge kelý qıyn. Biraq meniń oıymsha, barlyq memleketterdiń múddesi - túptiń túbinde onda birlesip jumys jasaý. Múddeli memleketterdiń birlesken jumysynsyz, tyǵyz jumyssyz «Islam memleketin» jáne lańkestikti joıý múmkin emes», - dep túıdi oıyn Nursultan Nazarbaev.
