Qusbegilik saıysy Dúnıejúzilik kóshpendiler oıynyna alǵash ret qosyldy - Baǵdat Múptekeqyzy

ALMATY. KAZINFORM - V Dúnıejúzilik kóshpendiler oıyndarynyń bastalýyna az kún qaldy. Bıylǵy oıyndarǵa Almatydan eki sportshy qatysady. Olar «qazaq kúresi» boıynsha el namysyn qorǵaıdy. Bul týraly Óńirlik kommýnıkatsııalar qyzmetiniń brıfınginde Ulttyq jáne at sporty klýbynyń jetekshisi Nurlan Ospanov aıtty.

Nurlan Ospanovtyń aıtýynsha, ár óńirden oıyndarǵa qatysatyn «elshiler» men bir «batyr» sportshy taǵaıyndalady. Olardyń mindeti – oıyndardyń mańyzdylyǵy men erekshelikterin nasıhattaý, sondaı-aq kezdesýler men dóńgelek ústelderdi uıymdastyrý.

Al respýblıkalyq «Qusbegilik» federatsııasynyń vıtse-prezıdenti, «Qyran» federatsııasynyń atqarýshy dırektory Baǵdat Múptekeqyzy bul oıyndar – qazaq halqynyń biregeı ulttyq bolmysyn álemge pash etý múmkindigi ekenin atap ótti.

«Aldaǵy is-shara kóshpendiler oıyndarynyń álemdegi deńgeıin ǵana emes, Qazaqstannyń mádenı jáne sporttyq qundylyqtaryn da kórsetedi. Bizdiń ulttyq sport túrimiz – «qusbegilik» aldyńǵy tórt oıynnyń baǵdarlamasyna kirmegen edi, biraq bıyl ol engizilip otyr, biz buǵan óte qýanyshtymyz. Búrkit – qazaq rýhy men tózimdiliginiń sımvoly, ol sondaı-aq bizdiń ulttyq týymyzda beınelengen», – dedi Baǵdat Múptekeqyzy.

Eske salaıyq, buǵan deıin Astanadaǵy sport nysandardyń Kóshpendiler oıynyna daıyndyǵy týraly jazǵanbyz.