Qusbegilik – kóshpendilerge ortaq qundylyq – atyraýlyq qusbegi Arman Qoshqarov
ATYRAÝ. KAZINFORM – Astanada ótip jatqan V Dúnıejúzilik kóshpendiler oıyndarynda el namysyn qorǵaıtyn qusbeginiń qatarynda Arman Qoshqarov ta bar. Ol qusbegiliktiń qyr-syryn 16 jasynda ákesinen úırengen. Sodan beri qyran baptap, qusbegilikti dáriptep keledi.
Arman Qoshqarov Dúnıejúzilik kóshpendiler oıyndaryna birneshe ret qatysqan. Alǵash ret 2014 jyly Qyrǵyzstanda ótken Dúnıejúzilik kóshpendiler oıyndarynda eldiń namysyn qorǵady. Sol doda qazaqstandyq qusbegiler úshinshi júldege ıe bolǵan. Al, Túrkııada ótkizilgen kóshpendiler oıyndarynda qusbegilik baǵdarlamaǵa engizilmegen. Oǵan qusty tasymaldaý máselesi qıyndyq týdyratyny sebep bolypty.
«Qusbegilik – kóshpendilerge ortaq qundylyq. Al, ańǵa búrkit salý, tazy júgirtý – qazaqtyń baǵzydan jetken saıatshylyq óneri. Qazaqtyń óneri qusbegilerdiń ulttyq qundylyqqa adaldyǵynyń nátıjesinde búgingi urpaqqa jetti. Meniń ákem de qusbegilikti janyndaı jaqsy kóredi. Ákemniń janynda júrip, qus baptaýdyń, qusbegiliktiń qyryn-syryna ábden qanyqtym. Bala kezimde qus baptaýǵa oıanǵan qyzyǵýshylyǵym basylǵan joq», - deıdi Arman Qoshqarov.
Onyń aıtýyna qaraǵanda, ákesi alǵashynda qarshyǵa alyp bergen. Keıin búrkit baptaýǵa úıretken. Ol V Dúnıejúzilik kóshpendiler oıyndaryna daıyndyqty Kókshetaý óńirinde ótkizgen.
«Qus baptaýdy úırený qıyn emes. Eń bastysy, ynta qajet. Qusty balapan kezinen baptaǵan jón. Óıtkeni, balapan kezinen qolǵa úıretilgen búrkit ıesin daýsynan tanıdy. Oǵan talaı kýá boldym. Ózim 16 jasymnan beri qusbegilikti serik etip kelemin. Bul – meniń hobbıim emes», - deıdi Arman Qoshqarov.
Qusbeginiń pikirinshe, sońǵy jyldary qusbegiler qatysatyn saıystyń baǵdarlamasyna ózgeris engizilgen. Saıystyń keıbir túri kóshpendiler oıyndarynyń baǵdarlamasynan alynyp tastalǵan.
«Buryn qusbegiler qusty 200 metr qashyqtyqtan qolǵa shaqyratyn edi. Qazirge erejege sáıkes qashyqtyq 500-700 metrge ózgerdi. Al, kóshpendiler oıyndaryndaǵy qusbegiler qusty erkin ushyrý, shyrǵa qaǵý túrlerinen saıysady. Qusty ańǵa salý baǵdarlamaǵa engizilmeı qaldy», - deıdi Arman Qoshqarov.
Eske sala ketelik, budan buryn kóshpendiler oıyndaryna qatysatyn atyraýlyq Marat Beksultanuly sadaq atýdy ınternet jelisinen úırengenin aıtqan edi.
