Qusbegilik federatsııasynyń múshesinen Qyzyl kitapqa engen 35 jyrtqysh qus tárkilendi
ASTANA. KAZINFORM — QMA Pavlodar oblysy boıynsha departamenti sırek kezdesetin jáne joıylyp ketý qaýpi bar jyrtqysh qustardy zańsyz ıemdený jáne ustaý faktisi boıynsha jergilikti turǵynǵa qatysty sotqa deıingi tergep-tekserýdi aıaqtady.
Tergeý málimetinshe, kúdikti 2017 jyldan bastap «Qusbegilik» federatsııasynyń jáne Qazaqstannyń ulttyq qusbegilik quramasynyń múshesi bola otyryp, Qaraǵandy qalasyndaǵy óz úıiniń aýmaǵynda zańsyz tálimbaq uıymdastyrǵan.
Ańshylyq, qyran qustardy kútip-baptaý jáne emdeý taqyrybyna arnalǵan Instagram paraqshasy arqyly ol tabıǵı mekendeý ortasynan zańsyz alynǵan sırek jyrtqysh qustardy jetkizip beretin adamdarmen baılanys ornatqan.
— Tintý barysynda onyń turǵylyqty mekenjaıynan 35 jyrtqysh qus anyqtalyp, tárkilendi.
Olardyń qatarynda ıtelgi, búrkit jáne lashyn bar. Atalǵan qustar Qazaqstan Respýblıkasynyń Qyzyl kitabyna engizilgen jáne sırek kezdesetin ári joıylyp ketý qaýpi tóngen janýarlar sanatyna jatady, — delingen QMA habarlamasynda.
Kúdikti qamaýǵa alyndy.
Sot sanktsııasymen oǵan tıesili Toyota 4Runner avtokóligine tyıym salyndy.
Qazirgi ýaqytta qustar ýaqytsha Qaraǵandy qalasynyń haıýanattar baǵynda.
Sot úkimi zańdy kúshine engennen keıin olar tabıǵı mekendeý ortasyna jiberiledi.
Ózge aqparat Qazaqstan Respýblıkasy QPK-niń 201-babyna sáıkes jarııa etýge jatpaıdy.
Aıta ketelik Aqtóbede Qyzyl kitapqa engen 45 ań-qus túri qalaı qorǵalyp jatqany týraly jazǵan edik.
