Qusbegiler Dúnıejúzilik kóshpendiler oıyndaryna daıyndalyp jatyr
KÓKShETAÝ. KAZINFORM – Dúnıejúzilik kóshpendiler oıyndary qarsańynda qusbegiler Aqmola oblysynda oqý-jattyǵý jıyndaryn ótkizip jatyr.
Qusbegilik (saıatshylyq) federatsııasynyń atqarýshy dırektory Bazarbek Kúntýǵannyń aıtýynsha elimizdiń úzdik qusbegileri Kóshpendiler oıyndaryna degen daıyndyqtaryn qyzdyra túsken.
«Şýchınsk qalasynda tamyzdyń 12-si men 25-si aralyǵynda ótetin oqý-jattyǵý jıynymyzda 9 sportshy búrkit, qarshyǵa jáne ıtelgi qustarymen jattyǵyp jatyr. Kelesi oqý-jattyǵý jıynymyz Astana qalasynda, 27-shi tamyz ben 7-shi qyrkúıek aralyǵynda bolady», - dep atap ótti B. Kúntýǵan.
Qusbegilikten ulttyq qurama músheleri daıyndyq barysy jaıynda aıtyp berdi.
«5-shi Dúnıejúzilik kóshpendiler oıyndaryna daıyndalyp jatyrmyz. Bar bilgenimizdi, múmkinshiligimizdi paıdalanamyz. Eýropadan, Mońǵolııa, Qyrǵyzstannan myqty qarsylastar keledi. Olar da baryn salary anyq», - deıdi qusbegilikten ulttyq qurama múshesi Ibragım Bazarbaev.
«Şýchınsk qalasynda Kóshpendiler oıyndaryna daıyndyq ústindemiz. Qazir aldaǵy saıystaǵy úsh sanat boıynsha qatysatyn úsh búrkit, úsh ıtelgi, úsh qarshyǵany baptap jatyrmyz. Olar jaz boıy túlekte boldy. Endi etin tartyp, jyldamdyqqa daıyndaımyz. Al ózim dodaǵa Alǵyr atty búrkitpen qatysamyn», - dep atap ótti qusbegilikten ulttyq qurama múshesi Serikbek Kúntýǵanuly.
Kóshpendiler oıyndary aıasynda qusbegilikten (saıatshylyqtan) bolatyn saıys qyrkúıektiń 12-13 aralyǵynda, etnoaýyl aýmaǵynda ótedi.
Eske sala keteıik, Respýblıkalyq «Qusbegilik» federatsııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báıge», «Sadaq atý», «Teńge ilý», «Aýdaryspaq», «Jamby atý», «Kókpar», «Asyq atý», «JORYQ» at sporty jáne t.b. federatsııalar bar. QR Ulttyq sport qaýymdastyǵyn Islambek Saljanov basqarady.
Atap óteıik, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi. Іs-sharaǵa 89 elden 2000-nan astam sportshy qatysady dep josparlanýda. 5-shi Dúnıejúzilik kóshpendiler oıyndarynyń Bas demeýshisi - ALAGEUM ELECTRIC, Oıyndardyń Bas seriktesi - Halyk Bank. Astanada ótetin Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.
