Qusbegilik chempıonatyna qatysýshylarǵa kún raıy kedergi keltirip tur - federatsııa

ATYRAÝ. QazAqparat – Atyraý oblysy Jańatalap aýylynda qusbegilikten eresekter arasynda XVI Qazaqstan Respýblıkasynyń chempıonaty ótip jatyr. Sporttyq is-shara 26 aqpanǵa deıin jalǵasady, dep habarlaıdy QazAqparat respýblıkalyq qusbegilik federatsııasyna silteme jasap.

Jarysqa elimizdiń 14 oblysynan 50-ge jýyq sportshy qatysýǵa nıet bildirgen. Atap aıtqanda, Almaty, Aqmola, Qaraǵandy, Jambyl, Shyǵys Qazaqstan, Túrkistan, Mańǵystaý, Pavlodar, Atyraý, Abaı, Jetisý, Ulytaý oblystarynyń, sondaı-aq Astana qalasynyń sportshylary baq synaıdy. Chempıonattyń reglamenti boıynsha 31 búrkit, 11 qarshyǵa, 10 ıtelgi básekege tústi.

«Chempıonattyń alǵashqy kúni «Qolǵa qondyrý» saıysynyń qorytyndysy boıynsha 18 búrkit kelesi aınalymǵa ótti. Qatysýshylardyń aıtýynsha, qustardyń kórsetken nátıjelerine óńirdegi kún raıy da óz áserin tıgizgen. Aıta keterligi, chempıonattyń erejesine sáıkes tikeleı ıesiniń qolyna qonǵan búrkit qana maksımaldy 10 upaıdy enshileıdi. Osy rette aýa raıynyń qolaısyzdyǵyn eskere otyryp, qazylar alqasynyń sheshimi boıynsha 9 upaıdy enshilegen qatysýshylar da kelesi aınalymǵa ótti. Al, «Shyrǵaǵa salý» saıysynda 18 búrkit ekinshi kezeńge ótti. Atap aıtqanda, Aqmola, Almaty, Jambyl, Abaı, Qaraǵandy, Atyraý oblystary men Astana qalasynyń sportshylary jartylaı fınalǵa joldama aldy. Jarystyń ekinshi kúni, ıaǵnı búgin qustar «Qoıanǵa salý» saıysynda básekege túsedi», - delingen federatsııa taratqan málimdemede.