Qusbegilerdiń dástúrli "Sonar-2010" jarysy Saryjaz aýylynda ótedi
ALMATY. Aqpannyń 15-i. QazAqparat /Erlik Erjanuly/ - Aqpannyń 18-19 kúnderi Almaty oblysynyń Raıymbek aýdanyndaǵy Saryjaz aýylynda qusbegilerdiń dástúrli "Sonar-2010" jarysy ótedi,
dep habarlaıdy QazAqparat.
Ony Almaty oblystyq Sport jáne týrızm basqarmasy men QR Ulttyq sport túrleri qaýymdastyǵynyń qoldaýymen "Qyran" federatsııasy qoǵamdyq qory men "Jalaıyr Shora" ortalyǵy uıymdastyryp otyr. Bıyl bul shara "Qyran" federatsııasynyń 5 jyldyq mereıtoıymen tuspa-tus kelip otyr. Qordy Parlament Májilisiniń depýtaty Nurlan Ónerbaev basqarady, al atqarýshy dırektory Baǵdat Múptekeqyzy. "Qyran" federatsııasy dástúrli qusbegiler jarysynyń júıeli túrde ótýine uıtqy bolyp, oblystaǵy qusbegilerdiń kıim-keshek pen arnaıy qural-jabdyqtarmen qamtamasyz etip kele jatyr. Sondaı-aq "Qazaq qusbegileri" degen arnaıy kitap shyǵaryp, osy másele tóńirigende oı qozǵap júrgen jýrnalıster arasynda 2 jylda bir ret baıqaý ótkizýde.
"Buryn "Sonardy" Eńbekshiqazaq aýdanyndaǵy Nura aýylynda ótkizetinbiz. Qusbegilikti nasıhattaý maqsatynda byltyrdan beri ony jer-jerde ótkizýdi qolǵa aldyq. Máselen Áben Toqtasynovty eske túsirýge arnalǵan byltyrǵy saıys Talǵar aýdanynda ótse, federatsııanyń 5 jyldyǵyna arnalǵan bıylǵy jarys Raıymbek aýdanynda ótpek. Oǵan 40-tan astam qusbegi qatysqaly otyr. Bolashaqta ony Abaı elinde jáne respýblıkanyń ózge de oblystarynda uıymdastyrý josparlanýda", deıdi "Qyran" federatsııasynyń vıtse-prezıdenti Sáken Ábdiqalıev.
