Qusaıynov Erboldyń Almatydaǵy teraktige esh qatysy joq - advokat
«Biz dárigerler sekildi aldymyzǵa kelgen adamnyń kim ekenine qaramastan qorǵaýǵa mindettimiz. Rýslan Kúlekbaevty qorǵaýdan advokattar bas tartty degen áńgime - beker. Memleket advokatty bekitedi, ol ony qorǵaýǵa mindetti. Maǵan da aǵaıyn-týystarym, otbasymdaǵy adamdar tarapynan ne úshin mundaı iste qorǵaýshy bolýǵa kelistiń degen tarapta syn aıtylyp jatyr. Meniń qorǵaýymdaǵy aıyptalýshy Qusaıynov Erboldyń atalǵan teraktige esh qatysy joq. Rýslan Kúlekbaevtyń qylmystyq isti uıymdastyrýdaǵy josparynan beıhabar bolǵan. Meniń qorǵaýymdaǵy adamdy urlyq, qarýly shabýyl jasady dep aıyptap otyr. Meniń qorǵaýymdaǵy Qusaıynov jáne qalǵan sottalýshylardyń Kúlekbaev jasaǵan teraktige qatysy joq. Jábirlenýshi Meşerıkovti Rýslan Kúlekbaevpen birge tonady dep aıyptaǵan. Meşerıkovtiń ózi de, onyń kórshileri de jábirlenýshini Kúlekbaevtyń jalǵyz ózi tonaǵanyn aıtyp, kýálik berdi. Kúlekbaev onyń sómkesin urlap ketken, sómkede «aıpad» qana bolǵan», - dedi Shamııan Jaıylqanov.
Aıta keteıik, búgin Almatydaǵy tergeý abaqtysynda Rýslan Kúlekbaevtyń isine qatysty basty sot otyrysy ótedi.
Almaty qalasynyń Qylmystyq ister jónindegi mamandandyrylǵan aýdanaralyq sotyna R.Kúlekbaevqa qatysty qylmystyq isti atalǵan sot sýdıasy Erlan Bolatov júrgizip jatyr. Kúlekbaev birneshe qanquıly tonaý jáne qaraqshylyq áreketterge qatysty bolyp otyr. Buǵan deıin habarlanǵandaı, tergeý toby 57 sot saraptamasy men zertteýler júrgizdi jáne bolǵan oqıǵanyń barlyq jáıtterin anyqtaý maqsatynda 200-den astam kýágerler men oqıǵany kórgen adamdardy tergedi. 2016 jyldyń 12 qazanynda 61 tomnan turatyn qylmystyq is sotqa joldandy. R.Kúlekbaevqa 8 quqyq qorǵaý jáne arnaıy organ qyzmetkerlerin jáne 2 beıbit turǵyndy óltirdi, terrorlyq akt jasady degen aıyp taǵyldy. Sonymen qatar, ol 3 beıibit turǵyndy óltirmek boldy dep aıyptalyp otyr.
Naqtyraq aıtqanda, aıyptalýshyǵa qatysty QR Qylmystyq kodeksiniń (QR QK) 255-baby 4-tarmaǵy (lańkestik akt), 99-baby 2-tarmaǵy (eki nemese odan da kóp adamdy óltirý), 24-babynyń 3-tarmaǵy (óltirý úshin shabýyl jasaý), 192-bap 4-tarmaq (top adamǵa qaraqshylyq shabýyl), 287-bap 4-tarmaq (zańsyz qarý tasymaldaý), 288-bap 2-tarmaq (qarýdy zańsyz jasaý), 291-bap 4-tarmaq (qarý urlaý), 200-bap 4-tarmaq (kólik urlaý), 126-bap 2-tarmaq (adamdy zańsyz bas bostandyǵynan aıyrý) boıynsha qylmystyq is qozǵalǵan.
Sondaı-aq, R.Kúlekbaevpen birge sotqa atys qarýyn zańsyz saqtap, ózimen birge alyp júrip, daıyndap, R.Kúlekbaevpen birge M. atty kásipkerdiń úıine qaraqshylyq shabýyl uıymdastyrǵan R.Lıý, J.Saparbekov, D.Ásembekuly, E.Qusaıynov, N.Ábdimomyn da sot zalynda.
Aıyptalýshy N.Ábdimomynǵa ruqsatsyz qaladan ketýine tyıym salynǵan. R.Lıýǵa qatysty QR QK 188-babynyń 4-tarmaǵy, 288-babynyń 1-tarmaǵy, 287-babynyń 4-tarmaǵyna qatysty qylmystyq is qozǵaldy. J. Saparbekovtiń ústinen QR QK 192-baby 4-tarmaǵy; 287-bap 4-tarmaq boıynsha qylmystyq is qozǵaldy. E. Qusaıynovqa qatysty QR QK 192-babynyń 4-tarmaǵy boıynsha, D. Ásembekulyna qatysty QR QK 192-babynyń 4-tarmaǵy, N. Ábdimomynǵa qatysty QR QK 287-babynyń 4-tarmaǵy boıynsha qylmystyq is qozǵaldy.
