Qus tumaýy: Vaktsınalaý tártibi qalaı júrgiziledi
«Qustardy vaktsınatsııalaýǵa qatysty toqtalsaq, profılaktıkalyq ekpe jasaý qus ósirýshiler odaǵy ókilderiniń qatysýymen qabyldanǵan strategııaǵa sáıkes júrgiziledi jáne QR Premer-Mınıstri orynbasarynyń hattamalyq sheshimimen rastalady. Qus sharýashylyqtarynda sýbektilerdiń bıologııalyq qaýipsizdiginiń kúsheıtilgen rejımin jáne «jabyq tıpti» kútip-ustaýdy eskere otyryp, qustardy ár basyna vaktsınatsııalaý kózdelmeıdi», - dedi Tursyn Qabdoldanov Ortalyq kommýnıkatsııalar qyzmetinde.
Onyń sózine qaraǵanda, qoldanystaǵy veterınarııalyq zańnamada kózdelgen mindettemelerine sáıkes, qus fabrıkalary ózderi de ekpe salady. Bul rette broıler qus fabrıkalary broılerlerdiń qysqa ómir súrýine baılanysty olarǵa vaktsınalaý júrgizbeıdi, óıtkeni olar táýliktik balapandar men ınkýbatsııalyq jumyrtqany qustar vaktsınalanatyn qus fabrıkalarynan alady. Jumyrtqa baǵytyndaǵy kásiporyndar taýyqtardy vaktsınalaıdy.
«2020 jylǵa bekitilgen josparǵa sáıkes, bıylǵy aqpan aıynda qus tumaýyna qarsy ekpe jasaýǵa 3 377 900 doza vaktsına bólindi. Oshaqtardy oqshaýlaý úshin qyrkúıek aıynda respýblıkalyq rezervten 2,3 mln doza bólindi jáne qyrkúıekte qosymsha 697 755 doza vaktsına, qazan aıynda 1,3 mln doza satyp alyndy. Osylaısha, óńirlerge 7,7 mln doza vaktsına bólindi, brıgadalar uıymdastyryldy, 1185-ten astam veterınarııalyq mamandar tartyldy.
Vaktsınatsııa úshin otandyq ekpemen tegin qamtylady. Qazirgi kezde májbúrli vaktsınatsııa aıasynda 2,8 mıllıonnan astam qus basy vaktsınatsııalandy. Aqmola, Shyǵys Qazaqstan, Qyzylorda oblystarynda jáne Nur-Sultan qalasynda vaktsınatsııa tolyǵymen aıaqtaldy», - dedi Tursyn Qabdoldanov.
Budan buryn habarlanǵandaı, Aýyl sharýashylyǵy mınıstrliginiń ókilderi qus tumaýyna qatysty jaǵdaıdy baıandady.
