Qus tumaýy: Reseı qus fabrıkalarynyń ónimine shekteý uzartyldy
Bul týraly QR Jumyrtqa óndirýshiler qaýymdastyǵynyń prezıdenti Maksım Bojko málimdedi.
Eske sala ketsek, maýsym aıynda QR AShM Reseıdiń 36 qus fabrıkasynyń ónimin ákelýge tyıym salǵan edi.
«Bıyl jazda Reseıdiń birqatar óńirinde qus tumaýy shyqty. Oǵan negizinen vırýs tasymaldaıtyn jabaıy qustardyń mıgratsııasy áser etti. Shyn máninde zamanaýı tehnologııalarmen jabdyqtalǵan jáne barlyq sanıtarlyq talaptar oryndalatyn iri qus fabrıkalarynda qus tumaýyn juqtyrý múmkin emes. Sebebi, onda únemi arnaıy zalalsyzdandyrý júredi, fabrıkaǵa kiretin barlyq qyzmetkerler, kólikter men jem-shópter sanıtarlyq óńdeýden ótedi. Al Reseıdegi qus tumaýy jabaıy qustarda ǵana emes, ónimderin halyqqa taratyp, bizdiń elge eksporttaıtyn ónerkásiptik qus fabrıkalarynda tirkeldi. Sondyqtan, qazan aıynda QR AShM Veterınarlyq baqylaý komıteti qus tumaýy tirkelgen RF birqatar qus fabrıkalarynan ónim ákelýge shekteýdi uzartty», - dedi Maksım Bojko Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, Qazaqstandaǵy qus tumaýy jaǵdaıy baqylaýda. Elimizdegi qus fabrıkalary sanıtarlyq-epıdemıologııalyq qyzmettermen birge únemi aldyn alý sharalaryn júrgizedi.
«Jabaıy qustar Qazaqstan aýmaǵynan da ushyp ótedi jáne veterınarlyq baqylaý mamandary olardan qus tumaýyn anyqtaıdy. Biraq, otandyq qus fabrıkalarynda eshqandaı qus tumaýy tirkelgen joq. Sebebi, Qazaqstannyń qus fabrıkalary qatań sanıtarlyq baqylaýy bar jabyq kásiporyndar bolyp sanalady. Qustar jabyq ǵımaratta, jeke mıkroklımatta ósiriledi jáne jabaıy qustarmen esh baılanyspaıdy. Ónimder mindetti túrde termoóńdeýden ótedi. Sondyqtan, Qazaqstanda óndirilgen jumyrtqa men qus eti qaýipsiz», - dedi Maksım Bojko.