Qus tumaýy: Qazaqstanda jumyrtqa tapshylyǵy týyndaýy múmkin be

NUR-SULTAN. QazAqparat – Bes oblysta tirkelgen qus tumaýyna baılanysty elde jumyrtqa tapshylyǵy týyndaýy múmkin be? Bul suraqqa Aýyl sharýashylyǵy mınıstrliginiń mal sharýashylyǵy ónimin óndirý jáne qaıta óńdeý departamentiniń dırektory Erkebulan Ahmetov jaýap berdi, dep habarlaıdy QazAqparat tilshisi.

«Qazirgi tańda Qazaqstanda 35 qus asyraý kesheni jumys istep tur. Olardyń qýaty ishki naryqtyń qajettigin jaýyp bere alady. Olar sonymen birge ónimin eksportqa da shyǵarady. Qazaqstannyń qus fabrıkalary jylyna 5 mıllıard jumyrtqa óndiredi. Іshki naryq 106 paıyzǵa oryndalyp otyr», - dedi Erkebulan Ahmetov OKQ-da ótken baspasóz máslıhatynda.

Onyń aıtýynsha, jyl basynan beri elde jumyrtqanyń baǵasy bes paıyzǵa arzandaǵan. Al qus tumaýy shyqqan Soltústik Qazaqstandaǵy bes qus fabrıkasy jumyrtqa óndirýmen aınalysady.

«Karantın sharalaryna baılanysty eki qus fabrıkasynyń qýaty tómendep qaldy. Alaıda shekteý bolǵanymen, qalǵan qus fabrıkalary óz qýatynyń esebinen bul qajettilikti jabady. Oblys búgingi kúni jumyrtqa jaǵynan ózin-ózi qamtamasyz etip otyr», - dedi departament dırektory.

Eske sala ketsek, buǵan deıin Aýyl sharýashylyǵy vıtse-mınıstri Gúlmıra Isaeva Qazaqstannyń bes oblysynda qus tumaýy tirkelgenin málim etken edi.