Qus sharýashylyǵyn damytýǵa qandaı qoldaý kórsetiledi — Bektenov jaýaby
ASTANA. KAZINFORM — Qus sharýashylyǵyna 15,3 mlrd teńge jeńildetilgen kredıt berildi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Qazirgi ýaqytta respýblıkada 7 asyl tuqymdy reprodýktor jumys isteıdi, onyń ishinde 4-eýi — et baǵytynda. Otandyq asyl tuqymdy materıalmen qamtamasyz etilý jumyrtqa baǵyty boıynsha 32 paıyzdy jáne et baǵyty boıynsha 44 paıyzdy quraıdy. Bul máseleni sheshý úshin Úkimet otandyq asyl tuqymdy bazany keńeıtý jáne jańa reprodýktorlar qurýǵa ınvestıtsııalardy yntalandyrý boıynsha sharalar qabyldap jatyr. Atap aıtqanda, Soltústik Qazaqstan oblysynyń tájirıbesin taratý baǵdarlamasyna 10 jylǵa deıingi merzimge jyldyq mólsherlemesi 2,5 paıyzdy quraıtyn jeńildetilgen kredıtter bere otyryp, asyl tuqymdy reprodýktorlar qurý boıynsha jańa baǵyt engizildi, — dedi Oljas Bektenov.
Úkimet basshysynyń dereginshe, asyl tuqymdy reprodýktorlar qurý kezinde ınvestıtsııalyq sýbsıdııalaý normatıvi 25-ten 40 paıyzǵa deıin ulǵaıtyldy. Sondaı-aq et jáne jumyrtqa baǵytyndaǵy bir kúndik asyl tuqymdy balapandy satyp alýdy ár balapanǵa tıisinshe 600 jáne 60 teńge mólsherinde sýbsıdııalaý kózdelgen. Budan bólek, Mal sharýashylyǵyn damytýdyń 2026-2030 jyldarǵa arnalǵan keshendi jospary osy jyldyń basynan beri qus fabrıkalary men reprodýktorlardyń aınalym qarajatyn tolyqtyrýǵa jyldyq mólsherlemesi 5 paıyzdyq jeńildetilgen kredıt berý tetigi jumys isteıdi.
— Osy baǵyt boıynsha 15,3 mlrd teńge somasyna 15 joba qarjylandyryldy. Sonymen qatar óndiristik qýattardy arttyrý boıynsha jumys júrgizilip jatyr. Máselen, «Aitas KZ» AQ jáne «Alel Agro» AQ bazasynda jalpy qýaty 123 mln ınkýbatsııalyq jumyrtqa bolatyn reprodýktorlar qurý, sondaı-aq «Poultry Agro» JShS qýaty 100 mln bas bir kúndik balapan óndiretin jumyrtqa baǵytyndaǵy reprodýktor qurylysy josparlanǵan. Atalǵan jobalardy iske asyrý qus fabrıkalarynyń otandyq asyl tuqymdy materıalmen qamtamasyz etilýin arttyrýǵa jáne ımportqa táýeldilikti dáıekti túrde tómendetý úshin jaǵdaı jasaýǵa múmkindik beredi, — dedi Premer-mınıstr.
Aıta keteıik, sońǵy bes jylda qus sharýashylyǵy salasyndaǵy ǵylymı zertteýlerdi júrgizýge shamamen 540 mln teńge bólindi.
Sondaı-aq elimizge 77 mln dollardyń asyl tuqymdy qus balapany jetkizildi.
