Qus sharýashylyǵy: Importqa táýeldiliktiń sebebi ne
ASTANA. KAZINFORM – Sońǵy 5 jylda elimizge 77 mln dollardyń asyl tuqymdy qus balapany jetkizildi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
Úkimet basshysynyń atap ótýinshe, qus sharýashylyǵynda ǵylymı áleýetti damytýmen qatar ımporttyq asyl tuqymdy materıalǵa táýeldilikti tómendetý negizgi mindetterdiń biri sanalady.
- 2021-2026 jyldary 77,5 mln AQSh dollary somasyna 47 mln bas bir kúndik asyl tuqymdy balapan jáne 168 mln AQSh dollary somasyna 448 mln ınkýbatsııalyq jumyrtqa ımporttaldy. Bul rette 2021-2025 jyldary bir kúndik asyl tuqymdy balapan ımportynyń kólemi salystyrmaly túrde turaqty bolyp qaldy. Al ınkýbatsııalyq jumyrtqany ákelý 35,6 paıyzǵa artyp, 2025 jyly 103,7 mln danaǵa jetti, - dedi Premer-mınıstr.
Onyń paıymynshsha, mundaı dınamıka qus sharýashylyǵy ónimderiniń otandyq óndirisiniń artýyna jáne kásiporyndardyń asyl tuqymdy materıalǵa tıisti suranysyna baılanysty boldy.
- Sonymen qatar menshikti reprodýktorlyq bazanyń shekteýli bolýy salany syrtqy jetkizilimderge táýeldi kúıde qaldyryp otyr, - dedi Oljas Bektenov.
Aıta keteıik, sońǵy bes jylda qus sharýashylyǵy salasyndaǵy ǵylymı zertteýlerdi júrgizýge shamamen 540 mln teńge bólindi.
