Qus sańǵyryǵynan energııa: Qazaqstanda bıogaz óndirisi qarqyn alyp keledi
ASTANA. KAZINFORM – Qazaqstandyq agrokásiporyndar óndiris qaldyqtaryn tıimdi paıdalanyp, «jasyl» energetıka baǵytyndaǵy jobalardy belsendi iske asyryp jatyr. Bıogaz óndirisi búginde tek ekologııalyq sheshim ǵana emes, agrobıznestiń ekonomıkalyq turǵydan tıimdi baǵytyna aınaldy.
Aýyl sharýashylyǵy mınıstrliginiń málimetinshe, osy baǵyttaǵy tabysty jobalardyń biri – 2018 jyly qus qaldyqtaryn óńdeý arqyly bıogaz óndirý júıesin engizgen «Agrofırma Kýrma» JShS. Joba aıasynda kásiporynda elektr jáne jylý energııasy, sondaı-aq organıkalyq tyńaıtqyshtar óndirisi jolǵa qoıylǵan. Investıtsııalyq jobanyń jalpy quny 573 mln teńgeni quraıdy.
- Qazirgi ýaqytta bıogaz stantsııasy táýligine 150 tonnaǵa deıin taýyq sańǵyryǵyn óńdeıdi. Nátıjesinde quramynda 65% metan bar 22-23 myń tekshe metr bıogaz óndiriledi. Elektr energııasyn óndirý kólemi saǵatyna 600 kVt-qa deıin jetse, organıkalyq tyńaıtqyshtar táýligine 20 tonnaǵa deıin shyǵarylady.
Jobanyń negizinde qus sharýashylyǵynan shyǵatyn organıkalyq qaldyqtardy qaıta óńdeý tehnologııasy jatyr. Fermentatsııa barysynda túzilgen bıogaz elektr energııasyn óndirýge paıdalanylady. Sonymen qatar óndirilgen organıkalyq tyńaıtqyshtar kásiporynnyń egistikterinde qoldanylyp, ımportqa táýeldilikti azaıtýǵa jáne shyǵyndardy qysqartýǵa múmkindik beredi, - delingen aqparatta.
Derekke qaraǵanda, stantsııa iske qosylǵaly beri 15 mln kılovatt-saǵat elektr energııasy óndirilgen. Kásiporyn jyl saıyn 100-190 mln teńge aralyǵynda tabys tabady.
Mınıstrlik málimetinshe, «Agrofırma Kýrma» tájirıbesi óndiristik qaldyqtardy tıimdi basqarý arqyly turaqty ári tabysty bıznes-model qalyptastyrýǵa bolatynyn kórsetedi. Bıogaz jobalary aýyl sharýashylyǵynda qosymsha tabys kózderin ashyp qana qoımaı, eldegi ekologııalyq baǵyttaǵy óndiristi damytýǵa da yqpal etedi.
Aıta keteıik, agrarlyq sektorda sý únemdeý tehnologııalary kúsheıtildi.
