Qus óndirýshiler odaǵy Astanada «jumyrtqa kúnine» oraı jármeńke uıymdastyrmaq

ASTANA. QazAqparat - Álemniń kóptegen elderinde qazannyń ekinshi jumasy Jumyrtqa kúni retinde atap ótiledi. Osyǵan oraı, Qazaqstannyń qus ósirýshiler odaǵy Astana ákimdiginiń jáne Áleýmettik kásipkerlik korporatsııalardyń qoldaýymen Jumyrtqa kúnin merekeleýge arnalǵan jármeńke ótkizýdi josparlap otyr. Bul týraly odaqtyń baspasóz qyzmetinen habarlandy.

«Jumyrtqa kúnin ótkizýde turǵan eshteńe joq. Óıtkeni, jumyrtqa eń suranysqa ıe ónim. Taýyq jumyrtqasynda bar joǵy 75 kalorııa ǵana. Solaı bola tura, bul aqýyzdyń táýliktik tutyný normasynyń 12 paıyzyn qamtamasyz etetin asa qunarly tamaq. Ol A, B6, B12, dárýmenderine, temir, fosfor, myryshqa baı», delingen baspasóz baıanynda.

Aıta keterligi, Qazaqstannyń qus óndirýshiler odaǵy osymen úshinshi jyl qatarynan Jumyrtqa kúnin atap ótpekshi. Astana qalasynyń ákimdigi jáne Áleýmettik kásipkerlik korporatsııasynyń qoldaýymen ótetin merekelestirilgen shara 9 qazanǵa elordadaǵy Shapaǵat bazaryna josparlanyp otyr. Onda qus ósirýshiler ózderiniń taýarlaryn usynyp, otandyq qus fabrıkalary qoljetimdi baǵaǵa ózderiniń sapasy joǵary ónimderin saýdalaıtyn bolady. Atap aıtqanda, sharaǵa Aqmola, Soltústik Qazaqstan, Qostanaı, Qaraǵandy, Almaty, Shyǵys Qazaqstan, Ońtústik Qazaqstan oblystarynan qus fabrıkalary atsalyspaq.

Aıta keteıik, Jumyrtqa kúni alǵash ret 1996 jyly Vena qalasynda atalyp ótilgen. Sodan beri halyqaralyq komıssııa osy sharanyń nátıjesinde jurtshylyqtyń jumyrtqany joǵary baǵalaıtynyna kóz jetkizgen bolatyn.Qazirgi tańda álemniń kóptegen elderinde qazannyń ekinshi jumasy Jumyrtqa kúni merekesine aınalyp otyr.