Qus fabrıkasy, vagon sheberhanasy — Atyraýda 20 joba júzege asyp, 1 300 jumys orny qurylady

ASTANA. KAZINFORM — Atyraý oblysynda 20 jańa joba iske asyrylyp, 1 300-den asa jumys orny ashylady. Bul týraly óńir ákimi Serik Shápkenov eseptik brıfıngte aıtty. 

Ákimniń aıtýynsha, 2025 jyldyń 10 aıynda Atyraý oblysynyń negizgi áleýmettik-ekonomıkalyq kórsetkishteri boıynsha oń ózgerister qalyptasqan.

— Óńirdiń damýynyń basty ekonomıkalyq draıveri — munaı-gaz salasy. Búginde quny 10,7 mlrd dollar bolatyn úsh iri ınvestıtsııalyq joba júzege asyrylyp keledi. Bul — polıetılen óndirý jobasy, gazseparatsııalyq qondyrǵy jáne gaz óńdeý zaýyty. Úsheýinde de jumys bastaldy jáne aldaǵy jyldary aıaqtaýdy josparlap otyrmyz, — dedi Serik Shápkenov Ortalyq kommýnıkatsııalar qyzmetinde.

Budan bólek, quny 104 mlrd teńge bolatyn 20 ınvestıtsııalyq joba iske asyrylyp jatyr, nátıjesinde 1 320 jańa jumys orny ashylady. Olardyń ishinde «ATYRAU CHICKEN» qus fabrıkasy men «BKM Atyraý» vagon dóńgelegin jóndeýge arnalǵan sheberhanany atap ótýge bolady.

Sonymen birge, bıylǵy qańtar-qazan aılarynda agroónerkásip kesheninde 116,8 mlrd teńgeniń ónimi óndirildi. Óńirdiń mal sharýashylyǵynda da ósim bar.

— Negizinen azyq-túlik qaýipsizdigin qamtamasyz etý baǵytynda ınvestjobalardy iske asyrýǵa basymdyq berilip otyr. Keler jyly jalpy quny 48,3 mlrd teńge bolatyn 12 joba iske qosylady, — dedi Atyraý oblysynyń ákimi.

Eske sala ketsek, Atyraýda 450 gektarlyq jańa arnaıy ekonomıkalyq aımaq quryldy. Ekonomıkalyq aımaqtyń jalpy aýmaǵy 450 gektar, onyń qurylymynda Atyraý-Dossor trassasy boıyndaǵy 400 gektarlyq ónerkásiptik aımaq jáne Jylyoı aýdanyndaǵy 50 gektarlyq sýbaımaq kiredi.