Qus fabrıkasy, ósimdik maıy jáne júgeri zaýyty: bıyl iske qosylatyn agro-jobalar

ASTANA. KAZINFORM — Bıyl el aýmaǵynda birqatar agroónerkásip kesheni jobasy iske qosylady. Jobalar týraly tolyǵyraq Aýyl sharýashylyǵy vıtse-mınıstri Ermek Kenjehanuly aıtyp berdi. 

— Bıyl agroónerkásip baǵdarlamany jalǵastyrý úshin 154 jobaǵa 200 mlrd teńge qarastyrylǵan, onyń ishinde 82 jobanyń jobalyq-smetalyq qujattamasy men saraptamasy daıyn. Bıyl birqatar iri qazaqstandyq joba iske asyrylyp jatyr, — dedi Ermek Kenjehanuly ortalyq kommýnıkatsııalar qyzmeti alańynda ótken baspasóz máslıhatynda.

Bıyl iske qosylatyn jobalar:

— Túrkistan oblysynda «Qazkrahmal» JShS jylyna 150 000 tonna kóleminde júgerini tereń óńdeý zaýyty iske qosyp jatyr. Jobanyń jalpy quny — 35 mlrd teńge;

— Shyǵys Qazaqstan oblysynda «ALTAI MAI» JShS jylyna 169 000 tonna ósimdik maıyn óndiretin maı zaýytyn iske qosyp jatyr. Jobanyń quny — 26,4 mlrd teńge;

— Jambyl oblysynda «Alel Agro» AQ jylyna 25 000 tonna ónim óndiretin qus fabrıkasyn iske qosý josparlanyp otyr. Jobanyń quny — 13,8 mlrd teńge;

— Atyraý oblysynda «ATYRAU CHICKEN» JShS jylyna 5 000 tonna ónim beretin broıler qus fabrıkasyn iske qosý kútilip otyr. Jobanyń quny — 9,9 mlrd teńge;

— Aqtóbe oblysynda «KazFeltec» JShS jylyna 2 500 tonna shıkizatty bastapqy óńdep, toqyma emes materıaldar óndiretin zaýytty iske qosý josparlanǵan. Jobanyń jalpy quny — 5 mlrd teńge.

Buǵan deıin habarlaǵanymyzdaı bıyl tórt aıda agroónerkásip keshenine 213 mlrd teńge ınvestıtsııa tartyldy.