Qus etine suranystyń neshe paıyzyn otandyq sharýashylyqtar qamtamasyz etip otyr
ASTANA. KAZINFORM — Halyqtyń qus etine suranysynyń 73 paıyzy otandyq óndiris esebinen qamtamasyz etilip otyr. Bul týraly Aýyl sharýashylyǵy mınıstrliginen málim boldy.
Vedomstvo aqparatyna qaraǵanda, 2025 jyldyń 1 qańtaryndaǵy jaǵdaı boıynsha qus sany 45,2 mln bas boldy (102,6%), onyń ishinde aýyl sharýashylyǵy qurylymdarynda 38,2 mln (104,2%). Al qalǵany jeke úı sharýashylyqtarynda.
- 2024 jyldyń 12 aıynda 358,7 myń tonna qus eti óndirildi (109,8%). Halyqtyń qus etine suranysynyń 73 paıyzy otandyq óndiris esebinen qamtamasyz etilip otyr. Importty almastyrý maqsatynda qus fabrıkalaryn salý jáne jańǵyrtý jumystary iske asyrylyp jatyr. 2024 jyly jobalyq qýaty 15 945 tonna bolatyn 6 qus fabrıkasy iske qosyldy, - delingen mınıstrliktiń Kazinform agenttigine bergen jaýabynda.
Eske salsaq, Qazaqstan byltyrǵy 11 aıda 38 myń tonna qus etin eksporttady.
2024 jyldyń aıaǵynda Joǵary aýdıtorlyq palatanyń tóraǵasy Álıhan Smaıylov qus etine memleketten bólinetin sýbsıdııalardyń tıimsiz ıgerilip jatqanyna birneshe mysal keltirdi.