Qus eti kórshi elderge ózimizdegi baǵadan arzanǵa satylyp jatyr – Álıhan Smaıylov

ASTANA. KAZINFORM – Joǵary aýdıtorlyq palatanyń tóraǵasy Álıhan Smaıylov qus etine memleketten bólinetin sýbsıdııalardyń tıimsiz ıgerilip jatqanyna birneshe mysal keltirdi. 

Májilis depýtattary aýdıtorlyq palatanyń qorytyndylaryna kúmán keltirip, qus etine sýbsıdııa alatyn kásiporyndardyń múddesin qorǵaı sóılep jatyr. Serik Egizbaev pen Erlan Saırovtyń ustanymyn áriptesteri Bolat Kerimbek te qoldaıtynyn bildirdi.
Joǵary aýdıtorlyq palata tóraǵasy Álıhan Smaıylov bul ýájderge naqty sandarmen jaýap berdi.

- Іshki otandyq qus etimen qamtamasyz etý úshin jyl saıyn óte úlken qarajat bólinedi. Byltyr qus etin óńdeıtin 32 kásiporyn 22 mlrd teńge sýbsıdııa aldy. Al Ulttyq statıstıka bıýrosynyń málimetine súıensek, byltyr ishki naryqtaǵy ımporttalǵan qus etiniń úlesi 34 paıyz bolyp otyr. Bul ishki naryqty áli de otandyq qus etimen qamtamasyz ete almaı otyrmyz degen sóz, - dedi ol.

Palata tóraǵasy qus etin óndirýshiler memleketten sýbsıdııa alyp shyǵarǵan ónimin kórshi elderge ishki naryqtaǵy baǵadan arzan satyp jatqanyn ashyp aıtty.

- Qazaqstanda óndiriletin qus eti ishki naryqtaǵy ortasha kóterme baǵasy – kılogramyna 1200 teńge. Al bólshek saýdada 1400 teńge. Dál sol sýbsıdııalanǵan qus eti kórshi elderge kóterme baǵamen kórshi elderge 800-900 teńgeden satylady. Bizdiń oıymyzsha, eger osy ónim ishki naryqta osyndaı tómen baǵamen satylsa, óz tutynýshylarymyzdyń suranysy kóbirek bolady jáne ımport úlesi tómendeıtin edi. Sondyqtan, bizdiń pikirimizshe, qus etine bólinip jatqan sýbsıdııanyń tıimdiligi jetkiliksiz. Qus etin óndiretin kásiporyndarǵa qarsy mindetter qoıylý kerek, - dedi Álıhan Smaıylov.