Qurylysy uzaqqa sozylǵan nysandarǵa ınvestorlar tartyldy – Altaı Kólginov
«Elordada 16 myń úlesker otbasynyń 13 myńynyń problemasy sheshildi. Qurylysy uzaqqa sozylǵan ózge nysandar boıynsha júıeli jumys júrip jatyr. Jergilikti oryndardy aralaý barysynda mynadaı problemaly turǵyn úı keshenderiniń (TK) úleskerlerimen kezdestim: «Sadovye kvartaly», «Komsomolskıı» jáne «Anısa» TK. Jalpy alǵanda qurylysy uzaqqa sozylǵan úsh kóppáterli turǵyn úı kesheninde shamamen 1,5 myń úlesker otbasy bar. Úlestik qurylystyń osy nysandary boıynsha qysqasha toqtalyp óteıin.
«Sadovye kvartaly» turǵyn úı kesheni – qurylysy 2013 jyly bastalǵan. Biraq 2014 jyly irgetasynyń qadalary turǵyzylǵan kúıinde ǵana qaldy. Búginge deıin osy nysannyń úleskerlerimen tek qazanshuńqyrdyń mańynda kezdeskenbiz. Odan beri aýqymdy jumys júrgizildi: tehnıkalyq tekserý ótkizilip, qurylysy jandandy, al eń mańyzdysy – ınvestorlar jumyldyryldy. «Sadovye kvartaly» turǵyn úı kesheniniń qurylysyn aıaqtaý úshin bıýdjetten qarajat bólingen joq. Nysannyń qurylysy jeke ınvestorlar esebinen salynyp jatyr.
«Komsomolskıı» turǵyn úı kesheni 7 jyl buryn problemaly nysanǵa aınaldy. Munda páterlerdi 600-den asa úlesker otbasy alǵan. Qazirgi ýaqytta nysanda vıtrajdardy montajdaý, terezeler ornatý, lıft jabdyqtaryn montajdaý, ınjenerlik jelilerdi ornatý jáne t.b. jumystar júrip jatyr.
«Anısa» turǵyn úı kesheni – segiz jyldyq tarıhy bar nysan. Bul nysanǵa da ınvestorlar tarttyq. Olar óz qarajaty esebinen nysannyń qurylysyn aıaqtaıdy. Máselen, 1 jáne 2-bloktarda qabyrǵalaryn qalaý jumystary, 5 jáne 6-bloktarda monolıtti jumystar júrip jatyr.
Úlestik qurylystardy aıaqtaý máselesin Memleket basshysy tikeleı nazarynda ustap otyr. 2019 jyldyń jazynda problemaly 150 kóppáterli turǵyn úı kesheni bolsa, qazir onyń 90-ny aıaqtaldy. Qalǵan nysandar boıynsha qadamdyq is-sharalar jospary bar», – dep jazdy elorda ákimi.
