Qurylysy 12 jylǵa sozylǵan Esqula sý qubyry paıdalanýǵa beriledi

NUR-SULTAN. QazAqparat – Qurylysy 12 jylǵa sozylǵan Esqula sý qubyry bıyl paıdalanýǵa beriledi. Bul týraly búgin Úkimet otyrysynda Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Halyqty sapaly aýyz sýmen qamtamasyz etý – mınıstrliktiń basym mindetteriniń biri. Sý kodeksine sáıkes, mınıstrlik eldi mekenderdiń shekarasyna deıin sýmen jabdyqtaý jónindegi fýnktsııalardy júzege asyrady jáne toptyq sý qubyrlaryn salý, rekonstrýktsııalaý jónindegi bıýdjettik baǵdarlamanyń ákimshisi», - dedi ol.

Mınıstrdiń dereginshe, qazirgi ýaqytta respýblıka boıynsha uzyndyǵy 15,5 myń shaqyrym 76 toptyq sý qubyry bar. Onyń ishinde 13,4 myń shaqyrymdy quraıtyn 39 toptyq sý qubyry respýblıkalyq menshikte. Olar 1,4 mln adam sany bar 655 aýyldyq eldi mekendi sýmen qamtamasyz etýde. Byltyr Aqmola, Qaraǵandy jáne Soltústik Qazaqstan oblystarynda sý qubyrlaryn salý jáne rekonstrýktsııalaý jónindegi 5 nysan paıdalanýǵa berildi. Sondaı-aq testilik rejımde Aqtóbe, Qaraǵandy jáne Qyzylorda oblystaryndaǵy 3 nysanda sapaly aýyz sý berildi. Nátıjesinde 800 shaqyrym jeli salyndy. Jalpy 5,8 myń adam turatyn 5 aýyldyq eldi meken sapaly aýyz sýǵa qol jetkizdi jáne 203 myń halqy bar 51 aýyldyq eldi meken men 3 qalada sýmen jabdyqtaý jaqsartyldy.

«Bıyl 2010 jyly bastalǵan Esqula sý qubyryn paıdalanýǵa berý josparlanǵan. Sonymen qatar, Almaty, Atyraý, Qaraǵandy, Qyzylorda, Mańǵystaý jáne Soltústik Qazaqstan oblystarynda toptyq sý qubyrlaryn salý jáne rekonstrýktsııalaý boıynsha 18 nysandy iske asyrýǵa 6,1 mlrd teńge kóleminde qarajat bólindi. Aıaqtalý merzimi - 2023-2024 jyldar. Nátıjesinde jalpy sany 458 myń adamdy quraıtyn 158 aýyldyq eldi mekende sýmen jabdyqtaý jaqsartylady», - dedi Serikqalı Brekeshev.