Qurylystaǵy jazataıym oqıǵalarǵa bas merdiger jaýapty bolýy tıis - D. Arǵandyqov

ASTANA. QazAqparat - Qurylys nysandaryndaǵy jazataıym oqıǵalar úshin bas merdigerge jaýapkershilik júktelýi tıis. Bul týraly búgin QR Parlamenti Májilisi Áleýmettik-mádenı damý komıteti men «Nur Otan» partııasy Fraktsııasynyń janyndaǵy Óńirlik saıasat jáne máslıhattarmen jumys jónindegi keńesiniń keńeıtilgen birikken otyrysynda densaýlyq saqtaý jáne áleýmettik damý vıtse-mınıstri Dáýlet Arǵandyqov málim etti.

«Qurylys nysandarynda eńbek qaýipsizdigi jaǵdaıy erekshe alańdaýshylyqty týdyryp otyr. Bul nysandarda bas merdiger óz betinshe jumystardy atqarmaı, qurylys jumystaryn oryndaý úshin syrttan uıymdardy tartady. Sáıkesinshe, osy nysandarda qosymsha tartylǵan uıymdardyń jumysshylary qaıǵyly oqıǵalarǵa ushyrap jatady. Alaıda, bul bas merdigerden jaýapkershilikti alystatpaıdy. Qazaqstan Respýblıkasy ratıfıkatsııalaǵan «Qurylystaǵy qaýipsizdik jáne gıgıena týraly» Halyqaralyq eńbek uıymynyń № 167 konventsııasyna sáıkes, bas merdigerge qurylys alańyndaǵy jalpy qyzmet úshin negizgi jaýapkershilik júkteledi», -dedi vıtse-mınıstr.

Onyń sózine qaraǵanda, 2014 jyly salalar boıynsha zardap shekkenderdiń kóbi qurylys kásiporyndarynda tirkelgen.