Qurylystaǵy alaıaqtyqtan mıllıardtaǵan qarjyny pysyqaılar basyp jatyr - májilismen
ASTANA. QazAqparat - Qurylys salasyndaǵy alaıaqtyq shemalardyń saldarynan mıllıardtaǵan qarjy qurylysqa túspeı, pysyqaı kásipkerlerdiń qaltasynda ketip jatyr. Parlament Májilisiniń búgingi otyrysynda Ádilet mınıstrine depýtattyq saýal joldaǵan májilismen Turǵyn Syzdyqov osylaı dabyl qaqty, dep habarlaıdy QazAqparat tilshisi.
«Qazir elimizdiń azamattarynyń arasynda notarıýstyń qyzmetin paıdalanbaıtyn adam kemde-kem. Tıisti zańǵa sáıkes, notarıattyq qyzmet 2012 jyly qabyldanǵan «Notarıattyq is júrgizý jónindegi ereje» boıynsha kórsetiledi. Azamattar men zańdy tulǵalardyń, kásipkerlerdiń quqyqtyq jáne múliktik qarym-qatynastaryn retteıtin osy qujattyń mańyzdylyǵynda kúmán joq. Áıtse de, sońǵy kezderi keıbir salalarda paıda bolǵan erekshelikter eskerilmeı otyr», - deıdi depýtat.
Halyq qalaýlysynyń aıtýynsha, bul erejege birde-bir ózgeris engizilmegen.
«Qoǵamymyzda keń etek alǵan daý-damaılardyń eń aýqymdysy - qurylys salasyndaǵy úleskerler men salymshylardyń sotqa júginýiniń bir sebebi osy erejede jatqan sııaqty. Daǵdarysqa ushyraǵan keıbir qurylys kompanııalary qurylys nysandaryndaǵy bos páterler men alańdardy óz týystary men jaqyndaryna, sýbmerdigerlerge rásimdep, jalǵan satyp-alý jáne satý sharttaryn jasaǵan. Maqsattary - óz aktıvterin jasyrý jáne jaýapkershilikten sytylyp shyǵý. Baıýdy kóksegen keıbir azamattar bes, on nemese odan da kóp páterlerdi, keńselerdi jáne avtoturaqty tegin nemese arzan baǵaǵa satyp alyp, qurylys aıaqtalmaı jatyp, naryqtyq baǵamen basqa azamattarǵa satýdy kásip qylǵan. Olar sol qurylys kompanııasynyń rıeltorlary men burynǵy qyzmetkerleri», - dedi ol.
Depýtattyń aıtýynsha, salyqtan jaltarý maqsatynda birshama qýlyqtar jasalýda.
«Mysaly, osyndaı jaǵdaı Stolıchnyı-2 turǵyn úı kesheninde boldy. Turǵyn úı kooperatıvteri tóraǵalarynyń biri 13 páterdi 26 azamatqa satqan. Keshe ǵana arzan baǵaǵa túsken páterdi qymbatqa satyp, talaılardy tentiretip baıyǵan optovıkterge jáne aktıvterin jasyrǵan qurylys kompanııalarynyń basshylary memleket baǵdarlamasyn paıdalanyp, taǵy da tegin páter alýy ǵajap emes. Osyndaı alaıaqtyq shemalardyń nátıjesinde mıllıardtaǵan qarjy qurylysqa túspeı, pysyqaı kásipkerlerdiń qaltasynda kete barǵany anyq. Jalǵan kásipkerlikpen kúresý úshin tez arada qoldanystaǵy zańnamaǵa kelesi ózgeristerdi engizý qajet dep sanaımyz», - degen depýtat erejege tómendegi sharttardy engizýdi surady.
Birinshi - salynyp bitpegen úıler men turǵyn úı jaılardy tsessııa shartymen satýǵa tyıym salý nemese osyndaı sharttarǵa salyq salý, ıaǵnı salyq kodeksine ózgerister engizý. Ekinshi - joǵaryda atalǵan tıisti ózgerister negizgi sharttar jasalǵan kezde notarıýs satýshydan mindetti túrde tólem qujattaryn, bank túbirtegin nemese fıskaldy chekti talap etý qamtamasyz etilýi tıis.
