Qurylysshylar odaǵy turǵyn úı baǵasyn arzandatý joldaryn usyndy
NUR-SULTAN. QazAqparat - Qazaqstannyń Qurylysshylar odaǵynyń ókilderi baspana satýdaǵy ózekti máselelerdi atady, dep habarlaıdy QazAqparat tilshisi.
«Elimizde baspana jetispeýshiliginiń ózekti másele bolyp otyrǵany barshaǵa aıan. Baspananyń qymbat bolýynan halyqtyń úı alýǵa qarajaty jetpeıdi. Memleket «7-20-25», «Nurly jer», «Baqytty otbasy» syndy baǵdarlamalar ázirledi. Biraq, bul baǵdarlamalar halyqtyń muqtaj bóligin qamtamasyz etýge baǵyttalǵan. Atalǵan sanatqa kirmeıtin turǵyndar baspana alýda qınalady», - dedi Qazaqstannyń Qurylysshylar odaǵy Saraptama bóliminiń basshysy Ásem Núkenova elordada ótken jıynda.
Sonymen birge, Odaq ókili baspananyń qymbattap, halyqtyń satyp alý qabiletiniń tómendep bara jatqanyn jetkizdi.
«Injenerlik ınfraqurylym men úılerdiń ishki abattanýy boıynsha mindettemeler qurylysshyǵa berilgen. Odan bólek, kólik turaqtaryn salý da baspananyń qymbattaýyna yqpal etedi. Al memleket, ıaǵnı Qurylys isteri komıteti úı salýshynyń qurylys materıaldaryn otandyq óndirýshilerden alýyn talap etip otyr. Importtyq taýarlardyń baǵasy da arzan, sapasy da jaqsyraq ekeni belgili. Onsyz da halyqtyń tólem qabileti jyldan-jylǵa tómendep keledi. Saldarynan, halyqtyń baspana degen suranysyn óteı almaımyz», - dedi Á. Núkenova.
Onyń aıtýynsha, qurylys salasyndaǵy memlekettik-jekeshelik áriptestikti arttyrý máseleni sheshýge kómektesedi.
«Ázirge áleýmettik baǵdarlamalar aıasynda memlekettik-jekeshelik áriptestik bar. Eger memleketti barlyq qurylys salasyna qosar bolsaq, baspana baǵasy arzandap, halyqtyń satyp alý tólemi artar edi. Úı salýshylar alypsatardyń aralasýynsyz-aq qurylys materıaldaryn satyp alýy úshin biryńǵaı onlaın-resýrs qurýdy usynamyz. Úı salý kombınattaryna turaqty júkteme berip, qoljetimdi baspana qurylysy boıynsha uzaq merzimdi kelisimshart bekitýge bolady. Odan bólek, Qurylys isteri komıteti úı salýshylardy tek qana otandyq materıaldardy satyp alýyn mindetteıtin zań jobasyn ázirlep jatyr. Olardyń materıaly qymbat bolǵandyqtan, Qurylysshylar odaǵy memlekettik-jekeshelik áriptestik aıasynda memlekettiń qurylys materıaldyn satyp alýǵa 20-30% mólsherde sýbsıdııa bólgenin qalaıdy», - dedi Ásem Núkenova.
