Qurylysshylar odaǵy Qurylys mınıstrligin qurýdy usyndy
NUR-SULTAN. QazAqparat – Nur-Sultanda Qazaqstan Qurylysshylar odaǵynyń eseptik konferentsııasynda Qurylys mınıstrligin qurý usynyldy, dep habarlaıdy QazAqparat tilshisi.
Qazaqstan Qurylysshylar odaǵy respýblıkalyq zańdy tulǵalar birlestigi (RZTB) tóraǵasy Talǵat Erǵalıevtiń aıtýynsha, bul jıynda qurylys salasyndaǵy iskerlik qaýymdastyq birneshe usynysty qamtıtyn hartııa jarııalaıdy.
«Hartııada jumysshy kadrlardyń tapshylyǵy, qurylys salasynda ózin-ózi retteıtin uıymdar qurý, QR Qala qurylysy kodeksin ázirleý jáne qabyldaý máselelerin kótergimiz keledi. Sondaı-aq, hartııada qurylysqa jer ýchaskelerin ashyq túrde berý týraly usynys bar. Biz óńirlerdi aralap shyqtyq jáne esh jerde jer telimderin berýge múmkindik joq», - dedi T. Erǵalıev Nur-Sultanda ótken konferentsııada.
Sonymen birge, odaq hartııasynda Qurylys mınıstrligin qurý jóninde usynys bar.
«QR Qurylys mınıstrligin qurý máselesin de kóterdik. Bizde ondaı mınıstrlik joq, Qurylys isteri jónindegi komıtet bar. Qurylys – úlken sala, sondyqtan bizge mınıstrlik qurý qajet. Tutastaı alǵanda, mınıstrlik qurý – kúrdeli másele, biraq ony qalaı qurýǵa bolatynyn oılaný kerek. Qazirgi ýaqytta komıtette eki basqarma men eki departament bar, olar úlken jumys kólemin ıgerýge úlgermeı jatyr. Indýstrııa jáne ınfraqurylymdyq damý mınıstrliginiń ózinde kóptegen baǵyttar bar. Al qurylys – bıýdjetti quratyn ekonomıkanyń bóligi», - deıdi T. Erǵalıev.
