Qurylysshylar kúni: kásibı mereke qarsańynda úzdikter marapattaldy

NUR-SULTAN. QazAqparat – Qurylysshylar kúni qarsańynda Indýstrııa jáne ınfraqurylymdyq damý mınıstrliginde sala qyzmetkerlerin marapattaýǵa arnalǵan jıyn ótti. Sharaǵa qatardaǵy jumysshylar, jobalaýshylar, arhıtektorlar men qurylys salasynyń ardagerleri qatysty, dep habarlaıdy QazAqparat vedomstvonyń baspasóz qyzmetine silteme jasap.

«Qurylys salasy – ekonomıkanyń basty draıverleriniń biri de biregeıi. Bul sala otandastarymyzdyń turmys sapasy men ál-aýqatynyń artýyna jáne barsha azamattarymyzdyń baıandy bolashaǵyn qamtamasyz etýge tyń serpin beredi. Sizderdiń qajyrly eńbekterińizdiń arqasynda sáýletti de ásem ǵımarattar boı kóterip, túrli áleýmettik nysandar kóptep salynyp jatyr. Sondyqtan da, kásibı merekelerińizdiń qarsańynda sizderdiń tabandy eńbekterińizge qurmet kórsetip, iltıpat bildirýdi uıǵardyq», - dedi mınıstr Qaıyrbek Óskenbaev.

Eren eńbegimen kózge túsken bir top qyzmetkerge arnaıy salalyq marapattar tabystaldy. Atap aıtqanda, «Qurmetti qurylysshy» tósbelgisimen «Granite» JShS brıgadıri Qurman Kenjeǵaraev, «Bazis Construction» JShS munaraly kran aıdaýshysy Marat Mýrbekov, «Irtysh-AS» JShS armatýrashysy Asantaı Musaev pen «Sapa» JShS tehnıkalyq qadaǵalaý bóliminiń basshysy Bolat Kızıev marapattaldy.

Al, «Qurmetti sáýletshi» tósbelgisi «Ǵımarat-Gorproekt» mekemesiniń dırektory Úsen Jumageldınge, «Qurmetti jolshy» belgisi DEÝ-62 kólik júrgizýshisi Vıktor Mıshenın, «Qazavtojol» AQ aqyly avtomobıl joldary departamentiniń mashınısi Valerııa Dýhsherer jáne «QAJ» Jambyl oblystyq fılıalynyń bólim basshysy Raıhan Kúlpeshovke berildi.

Qurylys salasynyń ardageri Kóken Dıýsýpovke «Eńbek ardageri» medali saltanatty jaǵdaıda tabystaldy.

Foto: gov.kz