Qurylysqa eýrokodtar engizý osy saladaǵy jumysqa esh kedergi keltirmeıdi

Búgin QR Parlamenti Májilisindegi Úkimet saǵatynda Qurylys jáne turǵyn úı kommýnaldyq-sharýashylyq isteri agenttiginiń tóraǵasy Serik Nokın osylaı málim etti.

Tóraǵanyń aıtýynsha, byltyrǵy jyly agenttik Qazaqstannyń aýmaǵynda Eýrokodtardy qoldanýǵa Eýropalyq standarttaý komıtetinen resmı ruqsat alǵan bolatyn. Sonyń nátıjesinde 2011 jylǵy 1 shildeden bastap eýrokodtar qurylys normalarymen erikti túrde qoldaný úshin qoldanysqa engizildi jáne 2015 jylǵa deıingi ótpeli kezeńde qazaqstandyq normatıvtermen qatar qoldanylady.

«Al qurylystaǵy sapaǵa keletin bolsaq, qazirgi tańda bizdiń jobalaý ınstıtýttarymyzdyń sapaǵa qatysty eshqandaı jaýapkershiligi qarastyrylmaı otyrǵany baıqalady. Qurylys sapasyna qatysty biz ary ketkende ondaı ınstıtýttardyń lıtsenzııasyn alyp qoıamyz. Áıtkenmen ol lıtsenzııany álgi kompanııa ertesinde ashyp, qaıta jumysqa kirise alady. Sondyqtan da, biz bul olqylyqty toqtatý úshin lıtsenzııalar berý sanattaryn bekittik», - deıdi Serik Nokın. Agenttik tóraǵasynyń aıtýynsha, aldaǵy ýaqytta qurylys salasyndaǵy lıtsenzııalaýǵa 3 sanat engizý kózdeledi. «Birinshi sanat - erekshi kúrdeli nysandardamen qosa 2,3 sanattaǵy nysandardaǵy jumystardy oryndaýǵa quqyq beredi. Olardyń keminde 10 jyl jumys tájirıbesi bolýy kerek. Ekinshi sanat - kúrdeliligi ortasha nysandar salý. Bulardyń keminde 5 jyl jumys tájirıbesi bolýy kerek. Úshinshi sanat - bul bazalyq deńgeı. Jumys tájirıbesi talap etilmeıdi, kúrdeli emes nysandardy salatyn bolady», - deıdi tóraǵa.