Qurylys jobalarynyń saraptamasy jeke sektorǵa júkteledi
ASTANA. QazAqparat - Sońǵy jyldary qurylys salasyndaǵy aldyn ala jobalaý jáne jobalaý-smetalyq qujattama salasynda túbegeıli ózgerister oryn aldy. Byltyrǵy jylǵy zańnamany jetildirý baǵytyndaǵy talqylaýlar nátıjesinde Qazaqstanda jekemenshik saraptama ınstıtýty engizilgen bolatyn.
Osyǵan baılanysty mundaı kúrdeli protsedýrany básekelestik ortaǵa berý saraptama sapasyn aıtarlyqtaı jaqsartyp, saraptaý kezeńinde ruqsat berý qujattaryn alý merzimi aıtarlyqtaı qysqarady dep kútiledi. Bul týraly Saraptama uıymdary palatasynyń baspasóz qyzmetinen habarlandy.
Aıta keterligi, memlekettik saraptamany tutastaı básekelestik ortaǵa berýdiń alǵysharty Elbasy aıqyndaǵan «100 naqty qadam» Ult josparynda belgilengen bolatyn. Bes ınstıtýttyq reformany qamtyǵan Ult josparynyń 47-i qadamynda: «Jobalaý-smetalyq jáne jobalaý qujattaryn saraptamadan ótkizýge baılanysty memlekettik monopolııadan bas tartý. Jobalardy saraptaýdy básekelesti ortaǵa tapsyrý» dep atap kórsetilgen bolatyn.
«2016 jyldyń aqpan aıynda akkredıttelgen saraptama kompanııalarynyń kásibı birlestikteriniń basyn quraǵan Saraptama uıymdarynyń palatasy ádilet organyna resmı tirkeldi. Endigi kúni elimizdegi kez-kelgen jekemenshik saraptama uıymy akkredıtatsııadan ótip, Palataǵa múshe bolǵan bolsa, onda óziniń qyzmetin júzege asyra alady», - delingen habarlamada.
Aıta keterligi, qazirgi tańda 37 saraptama kompanııasy palatanyń músheligine ótip otyr. Jaqynda ol kompanııalarǵa «Atameken» Ulttyq kásipkerler palatasy atynan arnaıy sertıfıkattar tabys etilgen bolatyn.
