Qurylys jáne jóndeý jumystarynyń arqasynda 196 myń adam jumysqa ornalasty

NUR-SULTAN. QazAqparat – 196 myń adam qurylys jáne jóndeý jumystarynyń arqasynda jumysqa ornalasty. Bul týraly QR Premer-Mınıstri Asqar Mamın málim etti, dep habarlaıdy QazAqparat tilshisi.

«Memleket basshysynyń tapsyrmasymen júzege asyrylǵan daǵdarysqa qarsy arnaıy baǵdarlama - Jol kartasy jumyssyzdyqtyń ósýine jol bermeýge jáne jumys oryndarynyń saqtalýyna oń áserin tıgizdi. Búgingi tańda Jol kartasy aıasynda jańa, kúrdeli jáne aǵymdaǵy ınfraqurylym nysandaryn salý boıynsha 6,6 myń joba iske asyrylýda. 196 myń adam jumyspen qamtyldy. Onyń ishinde jumyspen qamtý ortalyqtarynyń baǵyttary boıynsha shamamen 110 myń jumyssyz azamat jumysqa ornalasty. Olardyń ishindegi 43 myńnan astamy - jastar», - dep jazdy Asqar Mamın depýtattyq saýalǵa bergen jaýabynda.

Onyń aıtýynsha, Jol kartasyn iske asyrý barysynda 600-den astam jańa áleýmettik, kommýnaldyq jáne kólik ınfraqurylymy nysandary paıdalanýǵa beriledi. Bul óz kezeginde 15 myńǵa jýyq jańa turaqty jumys oryndaryn qurady.

«Jospardy iske asyrýdyń nátıjesi retinde sonymen qatar aralas salalardaǵy 100 myńnan astam turaqty jumys oryndarynyń qurylýyn atap ótýge bolady. Sonymen qatar qazir ınfraqurylymdyq jobalardy iske asyryp, kásipkerlik bastamany damytý arqyly jumys oryndaryn qurý boıynsha sharalardy kúsheıtý maqsatynda Jol kartasynyń quraldaryn jetildirýdiń jańa tásilderi ázirlenýde. Odan bólek ınfraqurylymdyq jobalar aıaqtalǵannan keıin turaqty jumysqa ornalasý talaptary eskeriledi», - dep atap ótti Premer-mınıstr.

Asqar Mamınniń habarlaýynsha Úkimet Jol kartasyn 2021 jyly jalǵastyrýdy kózdep otyr. Onyń qarjylyq turǵyda qamtamasyz etilýi kezinde bıylǵy júzege asyrylý tájirıbesi eskeriledi.

«Bul baǵyttaǵy jumys Úkimettiń erekshe baqylaýynda», - deıdi ol.