Qurylys jáne TKSh isteri komıteti basqarmasynyń eks-basshysy 8 jylǵa sottaldy

NUR-SULTAN. QazAqparat – Nur-Sultan qalasy Baıqońyr aýdanynyń № 2 soty Qurylys jáne turǵyn úı-kommýnaldyq sharýashylyq isteri komıteti Memlekettik sáýlet-qurylys baqylaý basqarmasynyń burynǵy basshysy A.Lıge jáne ózge de tulǵalarǵa qatysty qozǵalǵan qylmystyq is boıynsha aıyptaý úkimin shyǵardy. QazAqparat bul týraly elorda sotyna silteme jasap habarlaıdy.

Іs materıaldaryna sáıkes, A.Lı laýazymdyq ókilettigin paıdalanyp, «TarazQurylysEkspert» JShS dırektoryna ekinshi ret ákimshilik jaýapkershilikke tartý arqyly JShS-ny akkredıtatsııadan (sarapshylyq jumystarǵa ruqsat berý) aıyratynyn aıtyp, 1,9 mln teńge somasyndaǵy aqshany ıemdenip alǵan. Onymen qosa, A.Lı akkredıtatsııa komıssııasynyń múshesi bola tura, zańdy tulǵalarǵa sarapshylyq jumystardy júrgizýge akkredıtatsııany alýǵa qolǵabys etkeni úshin para alyp kelgen. Alǵan paranyń jalpy somasy 3,5 mln teńgeni quraıdy.

Sot úkimimen A.Lı 8 jylǵa bas bostandyǵynan aıyryldy. Jazany qaýipsizdik deńgeıi ortasha mekemede óteıdi. Sondaı-aq sot odan para somasyn, ıaǵnı 3,5 mln teńgeni jáne 1,9 mln teńge kólemindegi aqshalaı qarajatty memleket paıdasyna óndirip aldy.

Budan bólek, iske qatysy bar ózge tulǵalarǵa aıyptaý úkimderi shyǵaryldy. Atap aıtqanda, N.A.Janysova 28,2 mln teńge aıyppul tóleýi tıis. Oǵan para berý, laýazymdy tulǵaǵa bara berýde jáne ony alýda birneshe márte deldal boldy degen aıyp taǵyldy.

A.Lıge para berdi dep aıyptalǵan S.Jaıshylyqulyna 3 mln teńge aıyppul salyndy.

I.I.Mámedovke A.Lıge para berýde jáne ony alýda deldal boldy degen aıyp taǵylyp, oǵan 3,7 mln teńge aıyppul salyndy. Sondaı-aq odan qylmystyq isti jasaý barysynda alǵan 50 myń teńge óndirip alyndy.

Úkim zańdy kúshine engen joq.