Qurylys jáne árleý materıaldaryn shyǵaratyn jańa zaýyt salý máselesi talqylandy
ASTANA. QazAqparat - Qazaqstanda qurylys jáne árleý materıaldaryn shyǵaratyn zaýyt salynbaq, dep habarlaıdy QazAqparat QR IIDM baspasóz qyzmetine silteme jasap.
QR IIDM-de sheteldik ınvestorlarmen qurǵaq qurylys qospalary jáne keramıkalyq ydystardy óndirý boıynsha jobalardy iske asyrýǵa qatysty kezdesýler ótti. Kezdesý barysynda Indýstrııalyq damý komıtetiniń qurylys ındýstrııasy jáne aǵash óńdeý ónerkásibi basqarmasynyń basshysy Muhamed Andakov óńdeý ónerkásibindegi jobalardy iske asyrý úshin Qazaqstandaǵy ınvestıtsııalyq preferentsııalar jaıynda aqparat berdi.
Óz kezeginde qurylys jáne árleý materıaldary kompanııasynyń ókili jańa jobany tanystyryp, óziniń jumys istep turǵan kásiporyndarynyń jetistikteri týraly baıandady. Daıyn ónim Qazaqstan, Belarýs, Moldova, Túrikmenstan, Ázerbaıjan, Mońǵolııa, Armenııa, Qyrǵyzstan jáne basqa elderge eksporttalady. Qazirgi ýaqytta kompanııa Qazaqstan Respýblıkasynyń aýmaǵynda zaýyt ashýǵa nıetti.
Sonymen qatar, Almaty oblysynda keramıkalyq ydys-aıaq shyǵarýǵa nıetti qytaı kompanııasynyń ókilderimen kezdesý ótti. Jobany 2 kezeńde júzege asyrý josparlanyp otyr. 2026 jylǵa qaraı túrli-tústi keramıkalyq ydystar ónidirisiniń oqshaýlaý deńgeıi 100 paıyzdy quramaq. Budan bólek, 1000-ǵa jýyq jańa jumys orny qurylatyn bolady.
Kezdesýlerdi qorytyndylaı kele, M.Andakov birlesken jobalardy iske asyrýdy qoldap, yntymaqtastyqty damytýǵa daıyn ekendigin jetkizdi.
