Qurylys sapasyn baqylaýǵa arnalǵan portal iske qosyldy

NUR-SULTAN. QazAqparat - Qazaqstanda qurylys sapasyna baqylaý kúsheıedi. Osy maqsatta QR Indýstrııa jáne ınfraqurylymdyq damý mınıstrligi Biryńǵaı qurylys portalyn ázirledi, dep habarlaıdy QazAqparat.

QR Indýstrııa jáne ınfraqurylymdyq damý mınıstrligi baspasóz qyzmetiniń habarlaýynsha, atalǵan júıe qurylystyń barlyq qatysýshylaryn biryńǵaı tsıfrlyq ortada shoǵyrlandyrýǵa múmkindik berip, jumys sapasyn qadaǵalaýǵa zor yqpalyn tıgizedi.

Sonymen qatar portal jobalaý-smetalyq qujattaryn vedomstvodan tys saraptama portalynan avtomatty túrde alyp, barlyq qurylys qujattaryn tsıfrlyq (aktiler, jýrnaldar, nusqamalar) rásimdeýge múmkindik beredi.

«Qazirgi kúnde júıege elimizde júrgizilip jatqan qurylys nysandary týraly derekter bazasy júktelip, sarapshylardy testileý boıynsha modýlder iske qosyldy. Júıe test tapsyrýshy mamandy avtomatty túrde tekseredi. Osy arqyly test tapsyrýy tıis mamannyń ornyna basqa adamnyń kirýiniń aldyn alady. Tehnıkalyq qadaǵalaý uıymdary ETsQ arqyly qurylys barysy týraly málimetterdi jáne fotomaterıaldardy tirkeı otyryp, aı saıyn esep beredi. Bul memlekettik sáýlet-qurylys baqylaý basqarmasyna salynyp jatqan obektilerge kameraldyq monıtorıng júrgizýge múmkindik beredi.

Budan ózge, IIDM jaýapty memlekettik organdar tarapynan qurylysqa baqylaýdy kúsheıtýdi de josparlap otyr. Búgingi tańda osy taraptaǵy tıisti zańnamaǵa tıisti túzetýler engizilýde.

Mınıstrliktiń bul bastamasy sapasyz qurylys jumystarynyń aldyn alýǵa, qurylysy syn kótermeıtin nysandardy paıdalanýǵa jáne qabyldaýǵa tosqaýyl qoıady»,-delingen habarlamada.