Qurylys salýǵa ruqsat berý protsedýralary men merzimderiniń qysqartylýy - osy saladaǵy jemqorlyqtyń azaıýyna septigin tıgizedi - N. Tıhonıýk
ASTANA. Mamyrdyń 31-i. QazAqparat /Jasulan Amanbaıuly/ - Qurylys nysandaryn salýǵa ruqsat berý protsedýralary men merzimderiniń qysqartylýy - osy saladaǵy jemqorlyqtyń azaıýyna septigin tıgizedi.
Búgin, Astana ákimdiginde Qurylys jáne sáýlet zańnamasyndaǵy jańashyldyqtardy talqylaýǵa jáne túsindirýge arnalǵan semınar-keńeste QR Indýstrııa jáne jańa tehnologııalar mınıstrliginiń Qurylys jáne turǵyn úı-kommýnaldyq sharýashylyq komıteti tóraǵasynyń orynbasary Nıkolaı Tıhonıýk osyndaı pikir aıtty, dep habarlaıdy QazAqparat.
Eske sala keteıik, Qazaqstanda bıznes klımatty jaqsartý maqsatynda sáýlet jáne qurylys zańnamalaryna birqatar ózgerister engizildi.
N. Tıhonıýktiń aıtýynsha, respýblıkanyń úsh Zańyna ózgertýler men tolyqtyrýlar engizilip, Úkimettiń 3 qaýlysy shyqty. Soǵan sáıkes qurylysshylardyń aldynda turǵan kóptegen kedergiler alynyp tastaldy.
«Barlyq júıeni saraptaý barysynda bir mindetti birneshe protsedýralar atqaratyn bolyp shyqty. Qurylysqa tapsyrys bergen kásipker memorgandarǵa 16 qujat usynýy tıis bolǵan. Qazir bul júıeni ońtaılandyryp, qujattardyń sanyn 4-ke jetkizidik. Qurylysshylar men memorgandar arasyndaǵy baılanysty azaıtý arqyly júıeniń ashyqtyǵyna, jemqorlyq kórinisterdiń tómendeýine qol jetkizýge tyrystyq», deıdi N. Tıhonıýk.
Onyń oıynsha, protsedýralar oryndalmaıtyn bolsa, bıznes qaýymdastyq aldyndaǵy kedergilerdiń qataryn kóbeıtpeı, olardy alyp tastaǵan áldeqaıda durys.
