Qurylys salasyndaǵy tehnıkalyq retteýdiń otandyq júıesi keshendi qaıta qurýdy qajet etedi- S. Nokın
ASTANA. Qańtardyń 25-i. QazAqparat /Qanat Mámetqazyuly/ - Qurylys salasyndaǵy tehnıkalyq retteýdiń otyndyq júıesine keshendi qaıta qurý júrgizilýi qajet.
Búgin QR Parlamenti Májilisinde ótken Úkimet saǵatynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osylaı málim etti, dep habarlaıdy QazAqparat.
«Qazirgi kúni agenttik qurylys salasynda tehnıkalyq retteýdi reformalaýǵa daıyndyq jumystaryn júrgizip jatyr. Óıtkeni, búgingi tańda ozyq tehnologııalardy, jańa tıimdi jáne resýrs únemdeıtin qurylys materıaldary men buıymdaryn, qurylys óndirisin basqarýdyń jáne uıymdastyrýdyń progressıvti ádisterin engizý júrgizilmeı otyr. Budan basqa, qurylys salasy qaýipsizdikti qamtamasyz etýge, eńbekti jáne adamdardyń densaýlyǵyn qorǵaýǵa, qorshaǵan ortany qorǵaýǵa qoıylatyn zamanaýı talaptarǵa sáıkes kelmeıdi. Sondyqtan da saladaǵy tehnıkalyq retteýdiń otandyq júıesine keshendi qaıta qurý júrgizý talap etiledi», dedi S. Nokın. Agenttik tóraǵasynyń aıtýynsha, reformanyń daıyndyq kezeńi barysynda otandyq jáne sheteldik tehnıkalyq retteý tájirıbelerine taldaý júrgizilgen. Bul rette AQSh, Kanada, Avstralııa, Jańa Zelandııa jáne Japonııa sııaqty elder, sondaı-aq Eýroodaq memleketteriniń tájirıbesi de zerdelenip otyr.
«Bundaı sharalardyń nátıjesinde ekonomıkasy damyǵan elderdiń qurylys zańnamasy, sáıkestikti baǵalaý, qadaǵalaý jáne baqylaý salalaryndaǵy tehnıkalyq retteý júıelerinde barlyǵyna tán jalpy qaǵıdalar men belgiler anyqtaldy. Sonymen birge saladaǵy reformany tıimdi júrgizý úshin dúnıejúzilik tájirıbede keńinen taralǵan úlgilik qurylys kodeksin ázirleý máselesi de qarastyrylýda», dedi tóraǵa.
