Qurylys salasyndaǵy standarttaý jumystaryn halyqaralyq talaptarǵa sáıkestendirý kerek
ASTANA. Qazannyń 29-y. QazAqparat /Aıdar Ospanalıev/ - «Búginde qurylys salasyndaǵy standarttaý jáne sertıfıkattaý jumystaryn halyqaralyq talaptarǵa negizdeý basty máselelerdiń biri bolyp otyr. Buny búgin Memleket basshysy da, úkimet te mindettep otyr. Sondyqtan biz bul baǵyttaǵy jumystardy jyl sońyna deıin anyqtaýymyz qajet», - dedi búgin Standarttaý jáne sertıfıkattaý ınstıtýtynyń bas dırektory Arman Shaqqalıev. Bul týraly ol búgin BNews.kz portalynda ótken onlaın-konferentsııa barysynda aıtty.
«Biz Eýropa elderiniń qurylys salasyndaǵy standarttaý tájirıbelerin zertteýimiz qajet. Bul rette bizge birinshi kezekte halyqaralyq talaptarǵa qaıshy keletin, biraq elimizde qoldanylyp júrgen qujattardan arylýdy basty maqsat etip otyrmyz. Osy shara arqyly biz mańyzdy degen eki máseleni sheshemiz. Birinshiden, ózimizdiń qujattarymyzdy halyqaralyq, ıaǵnı eýropalyq talaptarǵa sáıkestendiremiz. Ekinshiden, biz qazir shekten tys kóbeıip ketken qujattar sanyn qysqartamyz. Bul qujattardyń arasynda qazir kásipkerlerdiń qyzmetin jandandyrýdyń ornyna, kerisinshe kedergi jasaıtyndary da bar», - dedi ınstıtýt dırektory.
Onyń sózine qaraǵanda, atalmysh maqsattardy kezeń-kezeńimen júzege asyrý úshin elde arnaıy baǵdarlama da daıyndalǵan.
