Qurylys salasyndaǵy rekord: Tórt aıda 13 myń úı qoldanysqa berildi
Jyl basynan bergi tórt aıda turǵyn úı qurylysy salasyna salynǵan ınvestıtsııa 321,9 mlrd teńgeni kórsetip, jyldyq ósim 17,1 paıyzǵa jetken. Oǵan qosa, 2018 jyly turǵyn úı qurylysyna rekordtyq kólemdegi 1,2 trln teńge salynǵanyn aıta ketý kerek.
Turǵyn úı qurylysyna ınvestıtsııanyń ósimimen birge qoldanysqa berilgen baspanalar sany da artyp keledi. Máselen, osy jyldyń qańtar-sáýir aılarynda elimizde 13,1 myń jańa turǵyn úı ǵımaraty qoldanysqa engizilgen. Bul rette, ótken jyldyń 12 aıynyń qorytyndysy boıynsha jalpy 38,7 myń turǵyn ǵımaraty berilgenin atap ótýge bolady. Osyny eskersek, turǵyn úı qurylysy jaǵynan bıyl da rekord jańarýy ábden múmkin.
Bir jyl ishinde barlyǵy 13,1 mln sharshy metr baspanany paıdalanýǵa berý josparlanyp otyr. 2019 jyldyń tórt aıynyń qorytyndysy boıynsha 3,25 mln sharshy metr berilip te qoıdy. Al 2018 jyldyń qorytyndysy boıynsha 12,1 mln sharshy metr aýqymyndaǵy úıdi paıdalanýǵa berý kózdelip, byltyr 12,5 mln sharshy metrmen jospar artyǵymen oryndalǵan.
Sońǵy jyldary baspanaǵa suranystyń artyp kele jatqanyn atap ótý kerek. Oǵan jeńildetilgen memlekettik baǵdarlamalar arqyly úıge qol jetkizý múmkindigi sebep bolyp otyr. 2019 jyldyń sáýir aıynyń sońyndaǵy jaǵdaı boıynsha ıpotekalyq nesıeler bir jylda 24,8 paıyzǵa ósip, 1,1 trln teńgeden 1,4 trln teńgege ósken. Jalpy, 2018 jyldyń sońynda Qazaqstanda ıpotekalyq nesıeleýdiń somasy 18,9 paıyzǵa, ıaǵnı 1,3 trln teńgege artqan.
Ótken jyly «7-20-25» baǵdarlamasynyń iske qosylýy ıpotekalyq naryqtyń tynysyn asha tústi. Máselen, 2019 jyldyń 30 mamyry boıynsha atalmysh baǵdarlamamen 7,9 myń ótinim maquldanyp, 91,4 mlrd teńge mólsherinde qaryz berilgen.
