Qurylys salasyndaǵy eńbekaqy Qazaqstandaǵy ortasha jalaqydan 22% joǵary

NUR-SULTAN. QazAqparat – Qurylys salasynda isteıtin jumysshylardyń jalaqysy Qazaqstandaǵy ortasha jalaqydan 22% joǵary, dep habarlaıdy QazAqparat RANKING portalyna silteme jasap.

Eń joǵary jalaqy Atyraý oblysy men el astanasynda tirkeldi. Keı óńirlerde qurylysshylar olardan úsh ese az tabys tabady.

2020 jyldyń alǵashqy toqsanynda qurylys salasynda isteıtin jumysshy sany 170 myń adamdy qurady. Bul byltyrǵy kórsetkishten 4,7%-ǵa tómen. Onyń ishinde naqty jumys isteıtinderdiń sany (júktilik pen bosanýǵa jáne bala kútimine baılanysty demalystaǵy adamdardy esepke almaǵanda) – 150,8 myń adam boldy. 2019 jyldyń birinshi toqsanymen salystyrǵanda 4,3%-ǵa az.

Qurylys salasyndaǵy ortasha jalaqy bıyl birinshi toqsanda 244,7 myń teńgege jetti, ıaǵnı 2019 jyldyń alǵashqy toqsanymen salystyrǵanda 13,8%-ǵa kóp. Inflıatsııany eskergen kúnniń ózinde taza ósim 7,4%-dy qurady.

Óńirler arasynda qurylysshylardyń ortasha jalaqysy Qyzylorda oblysynda – 117,5 myń men Atyraý oblysynda – 344,8 myń teńge aralyǵynda.

Joǵary jalaqy alatyn óńirler qatarynda Nur-Sultan qalasy (312,9 myń tg.) men Mańǵystaý oblysy (298,4 myń tg.) bar.

Jambyl (+43,3%), Batys Qazaqstan (+33,4%) oblystarynda jáne Nur-Sultanda (+33,4%) eńbekaqynyń óskeni anyq baıqalady. Ótken jylmen salystyrǵanda Atyraý oblysynda ǵana ortasha jalaqy 4,1%-ǵa tómendegen.