Qurylys salasyndaǵy dempıng: Sapasyz úıler qalaı salynady
ASTANA. QazAqparat - «Atameken» ulttyq kásipkerler palatasy qurylys salasyndaǵy zańsyzdyqtarmen kúresýge kiristi. Búgin sarapshylar toby arnaıy zertteýdiń nátıjesin jarııalap, dempıngke qatysty naqty mysaldardy da keltirdi, dep habarlaıdy QazAqparat tilshisi.
Palata tóraǵasynyń orynbasary Eldos Ramazanovtyń aıtýynsha, qurylys salasy boıynsha memlekettik satyp alýlardy zerdeleý kezinde baǵany ádeıi tómendetý, ıaǵnı baǵa dempıngi anyq baıqalady.
«Biz 8 myń tenderdi zerdelep shyqtyq. Sonda qurylys-montajdaý jumystary boıynsha dempıng 34 protsentke deıin jetti. Al jobalyq-smetalyq qujattardy daıarlaý salasynda atalǵan kórsetkish 72 protsentti qurady. Máselen, «Kazaxstanskıı Vodokanalproekt» JShS Almaty oblysynyń Talǵar qalasyndaǵy 300 oryndyq mektepti jobalaý qunyn 24 mln teńgege deıin túsirgen. Alaıda ol jumystyń óz baǵasy 61 mln teńge bolǵan. Sol sııaqty Qarasaı aýdanynda mektepke japsarlas qurylysty jobalaýǵa tender jarııalandy. 600 orynǵa eseptelgen nysandy jobalaý jumystaryna 54 mln teńge qarastyrylǵan bolatyn. Al «Prommedkontrakt» JShS baǵany 26 mln-ǵa deıin túsirip, tenderge kirip alǵan», - dedi E.Ramazanov búgin kásipkerler quqyǵyn qorǵaý jáne jemqorlyqqa qarsy keńestiń otyrysynda.
Onyń aıtýynsha, Astanada da baǵa dempıngi bar. Máselen, Uly Dala dańǵyly (burynǵy Hýseın ben Talal - avt.) boıynda ornalasqan turǵyn úıdiń qurylysy boıynsha texnıkalyq baqylaýdyń qyzmet quny 41 mln teńge dep belgilengen bolatyn. Alaıda «VEHI.KZ» JShS baǵany 17 mln-ǵa deıin túsirip, tenderdi op-ońaı alyp ketti.
«Osynyń nátıjesinde aqsha barynsha únemdeledi. Joba ózgertiledi, sapasyz materıaldar satyp alynady. Kásibı jumysshylardy da tartýǵa múmkindik bolmaıdy. Sodan qurylystyń sapasy tómendeıdi. Sol sebepti dempıngtiń shekti kórsetkishin tezdetip ornatý qajet. Sondaı-aq, qurylys salasyndaǵy memlekettik satyp alýlar boıynsha tıptik kelisimsharttardy bekitken jón», - dep atap kórsetti E.Ramazanov.
