Qurylys salasynda jumys istep jatqandar sany azaıǵanymen, olarda zardap shegý jaǵdaılary azaıar emes - alqa májilisi
ASTANA. Naýryzdyń 25-i. QazAqparat /Aıdar Ospanalıev/ - Elimizdiń qurylys salasyndaǵy jumystar bir kezderi qarqyndy júrgen bolatyn. Ol ýaqytta elimizde osy salada myńdaǵan adamdar eńbek etip, jumys barysynda dene jaraqatyn alý oqıǵalary da kezdesip turatyn.
Al búginde qurylys qarqyny báseńdep, bul salada jumys istep júrgen azamattar sany da aıtarlyqtaı azaıdy. Biraq jumys barysynda dene jaraqattaryn alý, eńbek qaýipsizdigin saqtamaýdyń saldarynan adam ólimine jol bergen jaǵdaılar sany azaıar emes. Bul týraly búgin Astana qalalyq prokýratýrasynyń alqa májilisinde elorda prokýrorynyń birinshi orynbasary Serik Qaramanov málim etti, dep habarlaıdy QazAqparat.
Onyń sózine qaraǵanda, elde sonymen qatar quzyrly organdardyń qurylys jumystary barysynda qandaı da bir baqytsyzdyqqa ushyraǵan nemese dene jaraqatyn alǵan adamdarǵa baılanysty qoldanyp otyrǵan sharalar elimizdiń zańdaryna sáıkes emes. «Atap aıtqanda, qazir osy máselege baılanysty 30-dan astam adamdardyń jaǵdaılary boıynsha tıisti sharalar qoldanylmaı otyr deýge bolady. ıAǵnı jaraqat alyp aýrýhanaǵa túsken azamatqa ótemaqy tóleý, ony osyndaı jaǵdaıǵa jetkizgen adamdardy jaýapqa tartý jumystary talapqa saı emes. Al shyn máninde bul ister muqııat zerttelip, olardyń sheshilý joldary qarastyrylýy kerek. Al bul mindetti oryndap otyrǵan organdardy kórip otyrǵan joqpyz. Búginde atalmysh másele óte ózekti bolyp otyr», dedi prokýrordyń orynbasary.
