Qurylys salasynda memlekettik satyp alýlarǵa qatysý jeńildeıdi
ASTANA. QazAqparat - QR Qarjy mınıstrligi qurylys salasynda memlekettik satyp alýlarǵa qatysýdy jeńildetý maqsatynda zańnamaǵa túzetýler engizýdi josparlap otyr. Bul týraly Májilistegi Úkimet saǵatynda málim boldy, dep habarlaıdy QazAqparat.
Qarjy mınıstri Baqyt Sultanovtyń sózine qaraǵanda, laýazymdy tulǵalardyń jaýapkershiligin kúsheıtý maqsatynda aýdıtorlyq sharalardy júrgizý kezinde sybaılas jemqorlyqqa qarsy standattar qabyldandy jáne memlekettik aýdıt salasynda atalǵan zań buzýshylyqtardy tómendetý boıynsha sharalar jospary bekitildi.
Osy oraıda tekserýler qorytyndysy boıynsha laýazymdy tulǵalarǵa qatysty tıisti sharalar qoldanylatynyna toqtalǵan mınıstr, «tek 2016-2017 jyldary 15 basshy qyzmettik sáıkessizdigi ári sógis pen eskertý túrindegi jaýapkershilikpen jazalandy»,- dedi.
Vedomstvo basshysynyń atap ótýinshe, quqyq qoldaný tájirıbesi boıynsha sybaılas jemqorlyq kórinisteri kóbinese qurylys salasyndaǵy memlekettik satyp alýlarda baıqalady. Bul baǵytta ótinimderdiń úılespeý sebepteri negizinen jobalaý-smetalyq qujatnamasymen baılanysty bolyp otyr.
«Máselen, konkýrstyq qujatnamalar boıynsha úlken kólemdegi rastaıtyn qujattardy usynýdy qajet etedi jáne eskirgen tehnıkany qamtyǵan. Osyǵan baılanysty sybaılas jemqorlyq táýekelderin azaıtý maqsatynda mınıstrlik qurylys salasynda satyp alýlar boıynsha áleýetti jetkizýshilerge talaptardy jeńildetý turǵysynda tıisti jumystardy bastap ketti. Sáıkes túzetýler zań jobasyna engizildi. Jaqyn arada ony Sizderdiń talqylaýlaryńyzǵa usynbaqpyz», - dedi mınıstr.
«Jalpy, usynylyp otyrǵan túzetýler aıasynda qurylystaǵy memlekettik satyp alýlar barysyndaǵy tapsyrys berýshiler men memlekettik aýdıt organdary tarapynan sybaılas jemqorlyq táýekelderi tómendeıdi dep paıymdap otyrmyz», - dep túıindedi sózin ol.
