Qurylys salasynda dempıng ýshyǵyp tur - Atameken palatasy

ASTANA. QazAqparat - Búginde memlekettik satyp alýlardyń jalpy kólemi 3,5 trln teńgeni qurap otyr. Sonyń úshten bir bóligi - 1,5 trln teńgesi qurylys salasyna tıesili, dep habarlaıdy QazAqparat tilshisi.

«Endi qarańyz, barlyq jerlerde barlyq qurylys qaýymdastyqtary, barlyq kompanııalar qatty dempıngke tap bolyp jatyrmyz dep shaǵymdanýda. Olardyń aıtýynsha, baǵany 74 paıyzǵa, texnıkalyq baqylaý boıynsha 99 paıyzǵa túsirip tastaıdy. Bunyń barlyǵy ádil básekelestikke ǵana emes, qurylys nysandarynyń sapasyna da keri áserin tıgizip otyr. Bizdińshe, baǵa dempıngin kúshtep shekteý kerek. Máselen, jobalyq-smetalyq qujattar men qurylys-montajdyq jumystardyń baǵasyn 5 paıyzdyń aınalasynda, al texnıkalyq baqylaýdy 10 paıyzdyń shamasynda belgilegen jón», - dedi «Atameken» UKP tóraǵasynyń orynbasary Tólemis Shotanov búgin prezıdıýmnyń keńeıtilgen májilisinde.

Aıta keteıik, «Atameken» UKP prezıdıýmnyń keńeıtilgen otyrysyna QR Úkimet basshysy Baqytjan Saǵyntaev qatysýda. Májiliste kásipkerlikti damytý boıynsha atqarylǵan jumystar men aldaǵy sharalar talqylanyp jatyr. Osy saladaǵy ózekti máseleler de pysyqtalýda.