Qurylys normalarynan aýytqyǵan 17 qurylys sýbektisi ákimshilik jaýapkershilikke tartyldy

Bul týraly búgin QR Qurylys jáne turǵyn úı-sharýashylyǵy isteri agenttiginiń alqa májilisinde Memlekettik sáýlet-qurylystyq baqylaý, qadaǵalaý, lıtsenzııalaý jáne attestatsııalaý departamentiniń dırektory Ǵalymjan Ábdiraıymov málim etti.

Onyń aıtýynsha, departament qyzmetkerlerimen bıyl qurylys-montajdaý jumystarynyń sapasyna qatysty 6 josparly jáne 29 jospardan tys tekseris ótkizilgen.

«Sáýlet jáne qurylys zańnamalyq normalaryn belden basqan 17 qurylys sýbektisi ákimshilik jaýapkershilikke tartyldy», - dep atap ótti ol.

Ǵ. Ábdiraıymovtyń atap ótkenindeı, SQO, Qostanaı, Aqtóbe, OQO, Mańǵystaý, ShQO, Qaraǵandy oblystarynda jáne Astana men Almaty qalalarynda da osyndaı 40-qa jýyq tekseris ótkizilgen. Qurylysta anyqtalǵan kemshilikterdi joıý boıynsha 28 nusqaý berildi.

«Sońǵy kezderi qurylys salasynda jobalyq jáne qurylys jumystarynyń sapasyzdyǵyna qatysty máseleler kóterilip, halyq tarapynan kóptegen aryz-shaǵymdar túsýde. Qalyptasqan jaǵdaıdy eskere otyryp, Memleket basshysynyń jarlyǵymen, Agenttikke sáýlet-qurylys jumystaryn tekserý jáne lıtsenzııalaý boıynsha jergilikti organdardyń quzyry berildi», - deıdi ol.