Qurylys qujattaryn ázirleýge arnalǵan shyǵystar qysqartylady – Álıhan Smaıylov
NUR-SULTAN. QazAqparat – Investıtsııalyq jobalarǵa bólinetin bıýdjettik shyǵystar 1,4 trln teńgege jetti. Bul týraly Úkimet otyrysynda QR Premer-Mınıstriniń birinshi orynbasary-Qarjy mınıstri Álıhan Smaıylov málim etti, dep habarlaıdy QazAqparat tilshisi.
Aǵymdaǵy jyldyń jeltoqsanynda óńirlerdegi memlekettik-jekeshelik áriptestik jobalary boıynsha monıtorıng júıesi engiziledi. Investıtsııalar men mindettemeler arasyndaǵy teńgerim, MJÁ mindettemeleriniń lımıtin jáne ótelýin baqylaý, nátıjelilikti baqylaý eskeriletin bolady. Memlekettik organdardyń vedomstvolyq baǵynysty uıymdarynyń shyǵystaryn qysqartý jáne qarajatyn únemdeý baǵytynda revızııa júrgiziledi. Taldaý qorytyndylary boıynsha 402 mlrd teńgege 173 memlekettik tapsyrmanyń ishinen jumystar men qyzmetter tizbesinen jalpy somasy 38 mlrd teńgege 68 tapsyrmany memlekettik satyp alýǵa aýystyrý jolymen alyp tastaý usynylady», - dedi Á. Smaıylov.
Onyń sózine qaraǵanda, ınvestıtsııalyq jobalarǵa bólinetin bıýdjettik shyǵystar 1,4 trln teńgeni qurady.
«Osy qarajatty tıimdi paıdalaný úshin úlgilik jobalardy mindetti túrde paıdalana otyryp, qurylys kezinde Jobalardyń biryńǵaı bankin qurý usynylady. Bul jobalaý-smetalyq qujattama men tehnıkalyq-ekonomıkalyq negizdeme ázirleýge arnalǵan shyǵystardy 30%-ke deıin nemese 13 mlrd teńgege, al qurylys merzimin 6-9 aıǵa deıin qysqartýǵa múmkindik beredi. Bul úshin zańnamaǵa ózgerister engizý qajet», - dedi Úkimet basshysynyń birinshi orynbasary.
