Qurylys kompanııalarynyń biryńǵaı tizimin jasaý kerek - «Atameken» UKP
ASTANA. QazAqparat - Búginde qurylys kompanııalaryna lıtsenzııany berý salasynda tártip buzýshylyqtar az emes. Sonyń saldarynan sany kóp, sapasy az kompanııalar kóbeıip ketti, dep habarlaıdy QazAqparat tilshisi.
«Atameken» ulttyq kásipkerler palatasynyń málimetine sáıkes, osy ýaqytqa deıin qurylysty júrgizýge 29 myń lıtsenzııa berildi. Alaıda belsendi jumys istep jatqan kompanııalardyń sany 300-ge de jetpeıdi.
«Búginde I sanattaǵy lıtsenzııany alý qıyn emes. II sanattaǵy lıtsenzııa da solaı. Ondaı kompanııany nebári 18 mıllıon teńgege satyp alyp, qurylyspen emin-erkin aınalysýǵa bolady. Ol úshin tájirıbeni de dáleldeýdiń qajeti joq. Kásibı mamandardy da, texnıkany da suramaıdy. Internetke suraý salsańyz, qurylys kompanııalarynyń tizimi shyǵa keledi», - deıdi palata tóraǵasynyń orynbasary Eldos Ramazanov.
Onyń aıtýynsha, respýblıka boıynsha 1300 kompanııanyń I sanattaǵy lıtsenzııasy bar. Biraq olar nemen aınalysady, qandaı nysandardy salyp jatyr, ony eshkim bilmeıdi.
«Atalǵan problemany sheshý úshin «Atameken» palatasy qurylys kompanııalarynyń biryńǵaı tizimin jasaýdy usynady. Onda kompanııa salyp shyqqan nysandar, materıaldyq-texnıkalyq baza, attestatsııadan ótken mamandar, buǵan deıin alǵan tenderler jáne taǵy basqa aqparat kórsetilýi shart. Biryńǵaı tizimniń arqasynda lıtsenzııa berýdiń ashyqtyǵy qamtamasyz etiledi. Kompanııalar arasyndaǵy báseke de qyza túsedi. Ondaı tájirıbe Belarýs elinde bar», - dep atap kórsetti E.Ramazanov.
Aıta keteıik, búgin kásipkerler quqyǵyn qorǵaý jáne jemqorlyqqa qarsy kúres keńesinde sarapshylar arnaıy zertteýdiń nátıjesin jarııalap, dempıngke qatysty naqty mysaldardy da keltirdi.
