Qurylys kompanııalary Astanada tegin páterler taratty

ASTANA. 25 jeltoqsan. QazAqparat - Búgin Astana ákimdiginde qurylys kompanııalary kembaǵal bala tárbıelep otyrǵan otbasylarǵa páter kiltterin tabystady. Dástúrge aınalǵan qaıyrymdylyq sharanyń saltanatty rásimi elorda ákimi Imanǵalı Tasmaǵambetovtiń qatysýymen ótti.

Aktsııa aıasynda 10 qurylys kompanııasy óz erikterimen baspanaǵa shyn muqtaj 11 otbasyǵa 1 jáne 2 bólmeli páterlerdiń kiltterin tabystady. Bul joly dástúrli bastamany «Astanapromstroı-M», «Allur auto Astana", "SK Qulager», «AstanaTreıdınterneshnl», «AstanaServısStroıMontaj-01», «Altyn XXI", "Azııa», «Astanastroıınvest», «Tsentr KazEnergoMontaj», «Alıansstroıınvest» syndy kompanııalar qoldady.

I.Tasmaǵambetovtiń aıtýynsha, bıznesmenderdiń tarapynan qarjylyq kómek bolmaǵanda, qýana qonys toıyn toılaǵaly otyrǵan atalmysh otbasylardyń eshqaısysynyń óz betterinshe baspana máselesin qamdaýǵa áleýmettik jaǵdaıy kótermeıtin.

«Elimiz úshin áleýmettik másele eń mańyzdy sharýalardyń biri. Osy jerge páterge eń muqtajdy jandardy jınap otyrmyz. Januıalaryńyzda bir emes, eki baladan aýrýǵa shaldyqqan. Sondyqtan, qıyndyqtardyń barlyǵyn túsine otyryp, osy Astanada Sizder úshin páter máselesi sheshilmeıtin bolǵandyqtan, ákimdik kásipkerlerge sońǵy 3-4 jyldyń júzinde osyndaı usynys tastady. Olar biraýyzdan qoldady. Ózderiniń tańdaýymen Sizderge búgin páter kiltterin tabystaýda. Eń bastysy balalaryńyzdyń jyldamyraq aıaqtaryna turyp ketip, solardyń azamat bolǵanyn kórýge jazsyn», - dedi Astana ákimi.

Jalpy alǵanda, búginge deıin qaıyrymdylyq sharasy aıasynda 60-tan astam otbasy baspanaly boldy.

Qala ákiminiń habarlaýynsha, qazirgi ýaqytta Astanada 28 myńnan astam adam páter kezeginde tur. Sońǵy 5 jylda 4,5 myń adam memlekettik baǵdarlama aıasynda baspanaǵa ıe bolǵan.