Qurylys kodeksin sapaly ári ýaqtyly ázirleý kerek – Álıhan Smaıylov
«Qurylys jáne turǵyn úı-kommýnaldyq sharýashylyq salasyn damytýǵa basa nazar aýdarý qajet. Prezıdenttiń Saılaýaldy baǵdarlamasyna sáıkes, aldaǵy 7 jyl ishinde 111 mln sharshy metr turǵyn úıdi paıdalanýǵa berý josparlanyp otyr. Onyń 15,3 mln sharshy metrin bıyl aıaqtaýymyz qajet. Alaıda, ótken jyldyń nátıjesin alyp qaraıtyn bolsaq, óńirlerde turǵyn úı qurylysynyń qarqyny tómendep ketkeni baıqalady», - dedi Álıhan Smaıylov Indýstrııa jáne ınfraqurylymdyq damý mınıstrliginiń keńeıtilgen alqa otyrysynda.
Osyǵan baılanysty Úkimet basshysy mınıstrlik baqylaýdy kúsheıtip, josparlanǵan kórsetkishterdi qamtamasyz etýi tıistigin basa aıtty. Sonymen birge jergilikti atqarýshy organdar da óz tarapynan tıisti ınfraqurylym tartý máselesin tolyǵymen sheshýi qajettigin eskertti.
«Sonymen qatar, Úkimetke jańa Qurylys kodeksin ázirleý tapsyryldy. Atalǵan qujatty sapaly jáne ýaqtyly ázirleý kerek. Ótken jyly turǵyn-úı kommýnaldyq sharýashylyq jelilerin salý jáne jańǵyrtý jumystarynyń arqasynda olardyń tozý deńgeıi 51 paıyzdan asqan joq. Memleket basshysynyń Saılaýaldy baǵdarlamasyna sáıkes, bul kórsetkishti 2029 jyldyń sońyna qaraı 40 paıyzǵa deıin tómendetýimiz kerek», - dedi Premer-Mınıstr.
