Qurylys isteri agenttigi Turǵyn úı qurylys jınaq bankimen birlesip, turǵyn úılerdiń qurylysyn salý jáne satý shemasyn ázirledi

Bul týraly búgin selektor formatyndaǵy Úkimet otyrysynda atalmysh agenttiktiń tóraǵasy Serik Nokın málim etti, dep habarlaıdy QazAqparat.

Onyń aıtýynsha, atalmysh shema boıynsha Turǵyn úı qurylys jınaq banki turǵyn úıdi belgili bir baǵa jáne yńǵaılylyq klasy boıynsha satyp alǵysy keletin salymshylardyń pýlyn qurady. Bank jergilikti atqarýshy organdarǵa turǵyn úılerdiń qurylysyn salý jóninde ótinishter jiberedi. Al jergilikti atqarýshy organ respýblıkalyq bıýdjettiń nesıeleri esebinen ınjenerlik ınfraqurylymy júrgizilgen buryn bólingen jer telimderinde turǵyn úılerdiń qurylysyn júrgizedi. Turǵyn úı paıdalanýǵa berilgen soń jergilikti atqarýshy organ banktiń salymshylarymen satyp alý-satý kelisimshartyn bekitedi. Óz kezeginde turǵyn úı qurylys jınaq banki salymshylardyń qarajattaryn jergilikti atqarýshy organdarǵa aýdarady. Jergilikti atqarýshy organ nesıeni respýblıkalyq bıýdjetten óteıtin bolady. S. Nokın atalmysh shema boıynsha ilki jobalardy Astana men Almaty qalalarynda jáne Aqtóbe oblysynda júzege asyrý josparlanyp otyrǵanyn atap kórsetti.

«Osy ákimdikterdiń derekteri boıynsha osy shema boıynsha 1 sharshy metrdiń qurylysynyń baǵdarlanǵan quny Almaty qalasynda 142,5 myń teńgeni nemese 950 dollardy, Astana qalasynda 121 myń teńgeni nemese 807 dollardy, al Aqtóbe oblysynda 90 myń teńgeni nemese 600 dollardy quraıtyn bolady. Deıturǵanmen qurylystyń túpkilikti qunyn jobalyq-smetalyq qujattama jáne memlekettik saraptama anyqtaıtyn bolady», dedi S. Nokın.

Onyń aıtýynsha, atalmysh jobany is júzinde júzege asyrý úshin jergilikti atqarýshy organdar ınjenerlik-kommýnıkatsııalyq ınfraqurylymdary júrgizilgen jer telimderin bólýi tıis. Atalmysh úsh óńirdiń ákimdikteri mundaı jer telimderiniń baryn rastap otyr. «Іlki jobalardy júzege asyrýdyń nátıjesinde, turǵyn úı qurylys jınaq júıesi arqyly 2011 jyly joǵarydaǵy óńirler boıynsha paıdalanýǵa beriletin turǵyn úıdiń jalpy kólemi 50,1 myń sharshy metrdi quraıdy. Bul 745 páter, onyń 364-i - Astana, 285-i - Almaty, 96-sy Aqtóbe oblysynda», dedi agenttik tóraǵasy.

Onyń paıymdaýynsha, atalmysh óńirlerdegi ilki jobalardy júzege asyrý úshin respýblıkalyq bıýdjetten 7,7 mlrd. teńge nesıelik qarajat bólý qajet. Onyń ishinde 2010 jyly qurylysty bastaýǵa 4,1 mlrd. teńge, al 2011 jyly qurylysty aıaqtaýǵa 3,6 mlrd. teńge bólinýi tıis. Osylaısha, 2011 jyldyń sońyna taman turǵyn úı qurylys jınaq bankiniń 745 salymshysy atalmysh shema boıynsha salynǵan turǵyn úılerdi satyp alatyn bolady», dedi S. Nokın.