Qurylys aıaqtalmaǵan, qarjy ıgerilmegen: Qyzylorda oblysynda birqatar ákim jaýapqa tartyldy

QYZYLORDA. QazAqparat - Qyzylorda oblysynda tıisti tapsyrmalardy oryndamaǵan Qyzylorda qalasy men Aral, Qazaly aýdandarynyń ákimderi tártiptik sharaǵa tartyldy, dep habarlaıdy QazAqparat tilshisi.

Oblys ákimi Nurlybek Nálibaevtyń tóraǵalyǵymen ótken jıynda oryndaýshylyq tártip máselesi qaraldy. Onda Memleket basshysy, Premer-mınıstr jáne aımaq basshysy bergen tapsyrmalardy oryndaý deńgeıi tómen basshylarǵa tártiptik shara qoldanyldy.

Bıylǵy jyldyń 8 aıynda 1180 hattamalyq tapsyrma berilip, 564-de (47,7%) nátıje shyqty. Al 296-nyń (25%) oryndalý merzimi bar. Sondaı-aq, 48 (5%) tapsyrma merzimi ótip oryndalyp, 109-y (9,2%) ishinara júzege assa, 154-de (13%) tıisti jumys atqarylmaǵan.

«Májilis saıyn tapsyrmalardyń merziminde ári sapaly oryndalýy kerektigin aıtyp kelemin. Degenmen, oryndaýshylyq tártipke qatysty birqatar másele bar. Keıbir ákimder men basqarma basshylary tarapynan nemquraılyq baıqalady. Bıylǵy 8 aıda 82 májilis ótkizilip, 1 180 hattamalyq tapsyrma berilgen. Máselen, bir Qyzylorda qalasynyń ózinde oblys ákiminiń 60-tan asa tapsyrmasy oryndalmaǵan. Qyzylorda qalasynyń ákimdiginen oryndaýshylyq máselesine kelgende beıjaılyq baıqalady», – dedi Nurlybek Mashbekuly.

Aımaq basshysy qala ákiminiń oblys ortalyǵyna jańa avtobýstardy ákelý merzimin keshiktirgenin, ınjenerlik ınfraqurylym júıelerin jańǵyrtý jumystaryn baıaý júrgizgenin qatań synǵa aldy. Odan bólek jol qurylysy salasynda da, kásipkerlik jáne ónerkásip basqarmasynyń jumysynda túıtkildi másele kezdesedi.

Al Aral aýdanynyń jol jaǵdaıyn jaqsartýǵa basqa aýdandarmen salystyrǵanda 6 ese artyq qarjy bólingen. Biraq jumystar óz deńgeıinde atqarylmaǵan, qarajattyń merziminde ári sapaly ıgerilmeý qaýpi bar. Turǵyndar aýdandyq mańyzy bar joldardyń bastalyp, aıaqsyz qalǵanyna narazylyq bildirýde.

Dál osyndaı túıtkil Qazaly aýdanynda da qalyptasqan. Jol jáne áleýmettik nysandar qurylysynyń merziminen keshiktirilýine jol berilgen.

Berilgen tapsyrmalardy óz deńgeıinde jáne merziminde oryndamaǵany úshin Aral aýdanynyń ákimi Serik Sermaǵambetovke sógis, qala ákimi Asylbek Shámenov pen Qazaly aýdanynyń ákimi Muhtar Orazbaevqa qatań sógis jarııalandy. Oblystyq jolaýshylar kóligi jáne avtokólik joldary, kásipkerlik jáne ónerkásip basqarmalarynyń basshylaryna eskertý berildi.

Aıta ketsek, qyzylordalyq jastarǵa kásipkerlikti damytý úshin 70 mln teńge beriledi.