Qurylys alpaýyttary elordada jeńildikpen beriletin 8 myń páter salady
NUR-SULTAN. QazAqparat – Bazis-A, BI-group, G-park sııaqty belgili qurylys kompanııalary Nur-Sultan qalasynyń ákimdigimen áleýmettik baspana salý týraly memorandým jasasty, dep habarlaıdy QazAqparat.
«Turǵyn úı máselesi – biz úshin basym baǵyt. Іri jetekshi qurylys kompanııalarymen jáne «Otbasy bankimen» birlesip, qoljetimdi turǵyn úı salý týraly memorandýmǵa qol qoıdyq. Olardyq qatarynda Bazis-A, BI-group, G-park, sııaqty qurylys kompanııalary bar» - dep jazdy Kólginov Instagram-paraqshasynda.
Qala basshysynyń sózinshe, bul memorandým baǵasy jeńildikpen belgilengen 8 myńnan astam páterdi, ıaǵnı 500 myń sharshy metrden astam baspana salýǵa múmkindik beredi. Osy úshin 160 mıllıard teńgeden astam ınvestıtsııa salynbaq.
«Bul úıler «Otbasy bankinde» shottary bar kezekte turǵandarǵa arnap salynady. Memorandým jeńildetilgen páterler salý jáne baspana kezeginde turǵandardyń sanyn qysqartý, ınvestıtsııalar esebinen qurylys salasyn yntalandyrý, qosymsha jumys oryndaryn qurý sııaqty birneshe mindetti oryndaýǵa múmkindik beredi», - deıdi Altaı Kólginov.
Ákimniń deregi boıynsha, el astanasynda 2018 jyly 1100, 2019 jyly 2900, byltyr 7 myńnan astam áleýmettik páter boı kótergen. Al bıyl taǵy 10 myń áleýmettik baspana salý josparlanǵan.
